«The Line» diýlip atlandyryljak täze şäher Saud Arabystanynyň demirgazyk-günbatarynda «Neom» kompaniýasy tarapyndan gurlar. Esasy maksat dizel hereketlendirijili awtoulaglar we uglerod zyňyndylary bolmadyk şäher gurmakdan ybarat. «The Line»-iň gurluşygy, köp babatda nebite garaşly bolan Saud Arabystanynyň ykdysadyýetini diwersifikasiýa etmäge gönükdirilen ösüş taslamalarynyň sanawyna girýär.
– «The Line» atly täze şäheriň gurluşygyny «Neom» kompaniýasyna tabşyrýaryn. 95 göterimi arassa tebigatdan ybarat boljak şäheriň awtoulaglardan hem-de uglerod zyňyndylaryndan azat bolar. Biz bu şäheri geljegiň şäherine öwürmelidiris – diýip, Saud Arabystanynyň mirasdüşer şazadasy Muhammet ben Salman Al Saud aýtdy.
«Şäheriň içinde elektroulaglar hereket eder. «The Line» köp sanly seýilgählerden we tebigy landşaftlardan ybarat uly şäher bolar. Bu şäher XXI asyrda we ondan soňky döwürlerde şäher dizaýnynyň we onuň tebigat bilen sazlaşygynyň mysaly bolmalydyr» diýlip, Neomyň metbugat beýanatynda aýdylýar.
«The Line»-yň gurluşyk işleri şu ýylyň birinji çärýeginde başlar we ýurduň ykdysadyýetini diwersifikasiýa etmegi maksat edinýän Saud Arabystanynyň Döwlet maýa goýum gaznasy tarapyndan maliýeleşdiriler. Metbugat beýanatyna görä, «Neom» taslamasy 380 müň iş ýerini döredip, 2030-njy ýyla çenli jemi içerki önüme 48 milliard dollar girdeji getirer.
