Angliýanyň “Premier Ligasynda” 23-nji tapgyrynda çempionlygy kesgitlejek oýun boldy. Soňky çempion “Liwerpul” öz meýdançasyndan öňki çempion “Mançester Sitini kabul etdi. Çekeleşikli geçen oýnuň 1-nji ýarymynda ýer eýeleri erjel oýun görkezse-de, soňlugy bilen, myhmanlar 4–1 hasabynda ýeňşini baýram etdi. 2003-nji ýyldan soň “Liwerpuly” ilkinji gezek myhmançylykda ýeňmegi başaran “Mançester Sitiniň” gollaryny Ilkaý Gündogan (49, 73), Sterling (76) hem-de Foden (83) derwezä girizdi. 2021-nji ýyla geçip, “Anfild”-de ýeňiş gazanyp görmedik “Liwerpulyň” çempionatyň çäginde “Anfild”-däki şu ýylyň ilkinji goluny Mohammed Salah penaltiden derwezä girizdi. Oýnuň 1-nji ýarymynda Ilkaý Gündogan 37-nji minutda penaltini dürs urup bilmedi. “Liwerpulyň” derwezeçisi Allison Beker soňky 2 golda örän gödek uly ýalňyşlyk goýberdi. 23 tapgyrda 40 utuk jemlän “Liwerpul” geçen ýylky derejesinden 27 utuk az toplady. “Mançester Sitiniň” tälimçisi Pep Guardiola karýerasy boýunça ilkinji gezek yzly-yzyna 14 duşuşykda (ähli ýaryşlarda) ýeňiş gazandy. Bir oýny kem 50 utukly “Mançester Sitiden” 10 utuk yza galan “Liwerpul” kem-kemden çempionlyk ýaryşynyň daşynda galýar.
