UEFA Çempionlar ligasynda ilkinji çärýek finalçylar belli bolup, “Borussiýa Dortmund” bilen “Porto” iň gowy 8 toparyň arasyna adyny ýazdyrmagy başardylar. Myhmançylykda 3-2 ýeňiş gazanan “Borussiýa Dortmund” öz meýdançasynda “Sewilýany” kabul etdi. Çekeleşikli geçen 2-2 deňlikde tamamlandy we nemes kluby ýoluny dowam etdirmegi başardy. Oýnuň 35-nji we 54-nji (penalti) minutlarynda tapawutlanan Erling Holann toparyny 2-0 öňe saýlady. Myhmanlar Ýussef En-Nesiriniň gollary (69 p, 90+6) bilen hasaby deňlese-de, bu olara çärýek finala çykmak üçin ýeterlik bolmady. Şeýlelikde, 2 oýnuň netijesi boýunça 5-4 üstün çykan “Borussiýa Dortmund” ilkinji çärýek finalçy boldy. Dortmundlylar 7-nji sapar çärýek finalda oýnarlar.
ERLING GOLANN
Duşuşykda ýer eýeleriniň 2 goluny geçiren Erling Holann birnäçe täze rekord goýd
y. Norwegiýaly hüjümçi 14-nji Çempionlar ligasy duşuşygynda 20-nji goluny geçirip, 20 gola iň çalt ýeten futbolçy rekordynyň eýesi boldy. Ondan öň Harri Keýn 24 oýunda 20 gol geçiripdi. Şeýle-de, ol UÇL-de 20 gol geçiren iň ýaş futbolçy boldy (20 ýaş 231 gün). Holann Çempionlar ligasynda 6 oýundan bäri 1, 4 duşuşykdan bäri-de 2 goldan geçirip gelýär. Ol yzly-yzyna 6 oýunda tapawutlanan iň ýaş futbolçy hem-de bassyr 4 oýunda 2 gol geçiren ilkinji futbolçy hökmünde rekordlaryň eýesi boldy.
