UEFA Çempionlar ligasynda 2-nji çärýek finalçy “Porto” bolup, olar bäsleşigiň güýçli wekillerinden “Ýuwentusy” ýaryşdan çykardylar. Portugaliýda 2-1 hasabynda ýeňiş gazanan “Porto” myhmançylykda 3-2 ýeňilse-de, yklymyň iň uly ýaryşynyň iň gowy 8 toparynyň hataryna goşulmagy başardy. Turindäki oýunda myhmanlar ilkinji bolup hasaby açdylar. 19-njy minutda eminiň bellän penalti urgusyny dürs uran goragçy Serjio Oliweira toparyny öňe saýlady. Ýer eýeleri bu gola 1-nji ýarymda amatly pursatlar döretseler-de jogap berip bilmediler. Ikinji ýarymyň başynda, has takygy, 49-njy minutda Federiko Kieza Ronaldonyň pasyndan soň hasaby deňledi. Ol 1-nji oýunda-da “Ýuwentusyň” ýeke-täk goluny geçiripdi. 63-nji minutda ýene-de Kieza tapawutlanyp, iki oýnuň netijesi boýunça umumy hasaby deňledi. Bu goldan 10 minut öň Mehdi Taremi 2 minutda sary kart alyp, meýdançadan çykaryldy. Bir oýunçy kemdigine garamazdan goragda berk duran “Porto” ýer eýeleriniň gol geçirmegine ygtyýar bermedi. Netijede, goşmaça 30 minut berildi. Şol goşmaça wagtyň tamamlanmagyna 5 minut galanda, Serjio Oliweiro jerime urgusyndan gol geçirip, hasaby deňledi. Ondan çärýek finala çykmagy üçin geçirtmezden 2 gol geçirmeli bolan “Ýuwentus” şolaryň birini 117-nji minutda Adrian Rabio derwezä girizse-de, 3-2 hasabynda gazanylan ýeňiş çärýek finala çykmak üçin ýeterlik bolmady. Şeýlelikde, “Ýuwentus” bassyr 2-nji möwsüm 1/8 finaldan yzyna gaýtdy.
15 ýyldan soň ilkinji gezek gol geçirip bilmedi
Toparyň super ýyldyzy Kristiano Ronaldo bolsa, 2005-2006 möwsüminden bäri ilkinji gezek UÇL-niň pleý-off tapgyrynda gol geçirip bilmedi. Ol bu duşuşykda UÇL-däki 40-nji asistini edip, bu görkezijä ýeten ilkinji futbolçy boldy.
“Porto” 8-nji gezek çärýek finalda çykyş eder. Çärýek finalyň bijeleri 19-njy martda çekiler.
