Şu gün – 12-nji maýda Söwda-senagat edarasynyň binasynda daşary ýurt maýa goýumlaryny Türkmenistanyň nebit-gaz pudagyna çekmek boýunça Halkara forumy öz işine başlady.
«Türkmengaz» we «Türkmennebit» Döwlet konsernleri, «Türkmengeologiýa» döwlet korporasiýasy, şeýle hem «Türkmenforum» Hojalyk jemgyýetiniň hyzmatdaşlygynda hem-de «Gaffney Cline» Britan kompaniýasynyň goldaw bermeginde Türkmenistanyň Maliýe we ykdysadyýet ministrliginiň guraýan forumyna 42 ýurtdan halkara nebit-gaz we maýa goýujy şereketleriň 160-dan gowragyndan 500 wekil, şeýle hem iri halkara düzümleriniň we maliýe edaralarynyň, şol sanda Bütindünýä bankynyň, Aziýa ösüş bankynyň, ESKATO-nyň, Halkara energetika forumynyň, GDA-nyň Ýerine ýetiriji komitetiniň, Ählumumy gaz merkeziniň, Gazy eksport edýän ýurtlaryň Maslahatynyň we başga-da birnäçe abraýly edaralaryň bilermenleri gatnaşýar. Adaty hem-de onlaýn görnüşde geçirilýän foruma gatnaşýanlar Türkmenistanyň nebit-gaz pudagyna, nebit-himiýa taslamalaryna maýa goýmagyň we taslamalary taýýarlamagyň mümkinçiliklerine jikme-jik syn berýärler, öňdebaryjy halkara nebit-gaz kompaniýalary öz garaýyşlaryny beýan edýärler. Forum özara tejribe alyşmak üçin hem amatly platforma bolup hyzmat edýär.
«Energetika bazarlarynyň ösüşiniň ählumumy meýilleri we özara peýdaly hyzmatdaşlygy ösdürmegiň geljegi» diýen tema bagyşlanan umumy mejlisde Hytaýyň Türkmenistandaky Adatdan daşary we Doly ygtyýarly ilçisi Sýan Naýçen, BMG-niň Türkmenistandaky Hemişelik utgaşdyryjysynyň işlerini wagtlaýyn ýerine ýetirijisi Kristin Weýgand, Türkmenistanyň Maliýe we ykdysadyýet ministri Muhammetgeldi Serdarow, SOCAR-yň ýolbaşçysy Rownag Abdullaýew, Beýik Britaniýanyň premýer ministriniň Türkmenistandaky söwda wekili, baronessa Nikolson Winterbornskaýa, Halkara Energetika Forumynyň (HEF) baş sekretary Jozef MakMonigl, BMG-niň Aziýa we Ýuwaş ummany üçin Ykdysady we durmuş komissiýasynyň (AÝYSK-yň) ýerine ýetiriji sekretary Armida Salsia Alisjahbana dagy çykyş etdiler.
Duşuşykda: ählumumy energetika gün tertibini goldamakda maliýe edaralarynyň orny; turba geçiriji taslamalar az uglerodly geljege geçmegiň hereketlendiriji güýjüdir; Hazar deňziniň kenarýaka çig mal ýataklary: özleşdirmek tejribeleri we täze maýa goýum mümkinçilikleri; uglewodorodlaryň pula öwrülmegine maýa goýmagyň taslamalary – geljege nazar ýaly temalar ara alnyp maslahatlaşylar.
Nebit-gaz we gaz-himiýa pudaklaryndaky, şol sanda nebitdir gazy çykarmagy ýokarlandyrmaga we Hazar deňziniň türkmen bölegindäki ýataklaryň netijeli özleşdirilmegine degişli täze maýa goýum taslamalary barada maglumatlary maýa goýmaga meýilli şahslaryň dykgatyna ýetirmäge mümkinçilik dörediljek forumda ähtnamalara we memorandumlara gol çekiler.
