PSŽ-niň braziliýaly super ýyldyzy Neýmar dünýä belli GQ žurnalynyň fransuzça nusgasyna beren beýanatynda Kristiano Ronaldo bilen bir toparda oýnamak isleýändigini aýtdy. Ol: “Men eýýäm ägirt ýyldyzlar bilen bilelikde çykyş etdim. Messi, Mbappe ýaly super ýyldyzlar bilen. Ýöne entek Ronaldo bilen däl” diýdi.
Möwsümiň ahyrynda “Ýuwentusdan” gitjekdigi baradaky gürrüňleriň dowam edýän şu günlerinden Neýmaryň bu beýanaty portugaliýaly ýyldyzyň indiki duralgasynyň PSŽ bolup biljekdigi barada pikir janköýerleri tolgundyrýar. Ýeri gelende aýtsak, golaýda Neýmar PSŽ bilen şertnamasyny 2025-nji ýyla çenli uzaltdy.
