Hytaýyň Marsy öwrenmek üçin iberilen “Zhurong” atly tigirli robotyň ilkinji düşüren suratyny iberendigi mälim edildi. Ýurduň Milli kosmos edarasy geçen hepdäniň ahyrynda Marsa gondurylan enjamyň düşüren ilkinji suratyny köpçülige ýaýratdy. Gyzyl planetanyň demirgazygyndaky “Utopia Planitia” atly düzlüge ýerleşdirilen enjam Gün panelleriniň açylmagy we ýeterlik mukdarda zarýad almagy bilen maglumat toplap, Ýere iberip başlady. Enjamyň iberýän signalynyň 17 minutda gelip ýetýändigi aýdyldy. Bu robotyň ulanyş möhletiniň azyndan 90 Mars gününe barabar boljakdygy bellendi.
Mundan ozal Sowet Soýuzy hem Marsa enjam ibermegi başarypdy. Emma bu ýurduň Mars taslamasy şowly netije bermändi. Hytaýyň kosmos enjamynyň gonan ýerine 1976-njy ýylda ABŞ-nyň Awiasiýa we Kosmos Agentliginiň (NASA) “Viking-2” taslamasynyň çäklerinde marsahod gondurylypdy. Bu ýerde irki wagtlarda umman bolandygy çaklanylýar.
Şu ýylyň 18-nji fewralynda hem NASA-nyň “Perseverance” atly robot enjamy Marsa gondurylypdy. Geçen ýyllarda Ýewropa Kosmos Agentliginiň Mars taslamasy hem iki sapar şowsuz tamamlanypdy. Häzirki wagtda Ýewropa ýurtlary Russiýa bilen bilelikdä “Rosalind Franklin” atly taslamany taýýarlaýar. Bu taslamanyň çäklerinde ilkinji kosmos gämisi geljek ýyl goňşy planeta iberiler.
