Angliýanyň “Premier Ligasynda” Çempionlar ligasyna ýollanma alan 2 klub soňky tapgyrda belli boldy. Mançester şäheriniň wekilleriniň – “Siti” bilen “Ýunaýtediň” 1–2-nji bolan çempionatynda “Liwerpul” 3-nji, “Çelsi” 4-nji ýeri eýeläp, Çempionlar ligasynda çykyş etmäge hukuk gazandy. Öz meýdançasynda “Kristal Palasy” Sadio Maneniň gollary bilen ýeňen “Liwerpul” 69 utuk bilen 3-nji ýeri eýeledi.
Geçen möwsümde-de soňky tapgyrlarda Çempionlar ligasyna ýollanma alan “Çelsi” ýene-de “Lester Sitiden” öňe saýlanmagy başardy. “Çelsiniň” UÇL-e gatnaşmagyna “Tottenham” toparynyň goşandy uly boldy. “Tottenham” topary myhmançylykda “Lester Sitini” Keýn, Şmeýhel (ö.d.) hem-de Beýliň (2) gollary bilen 4-2 hasabynda ýeňdi. 2-1 öňe saýlanan “Lester Siti” möwsümiň 242 gününi ilkinji 4-lükde geçirse-de, edil geçen möwsümdäki ýaly soňky tapgyrlarda Çempionlar ligasynyň daşynda galdy. Ýogsam “Çelsi” myhmançylykda “Aston Willadan” 2-1 hasabynda asgyn gelipdi.
