Başga şähere ýa-da ýurda gidilende ol ýerden sowgat alyp gaýtmak dünýäniň ähli halklarynda diýen ýaly däp bolsa gerek. Şol sebäpli daşary ýurtly myhmanlaryň gelýän ýerlerinde sowgatlyk dükanlary görmek bolýar. Ol ýerden getirilen sowgatlar bolsa uzak ýyllaryň dowamynda ýatlama bolup galýar. Eýsem, haýsy ýurtda nähili sowgatlyk harytlar has köp satylýarka?! Fransiýanyň syýahatçylyk kärhanasy “Club Med” ýurtlara görä has köp satylýan sowgatlyk harytlar barada maglumat taýýarlapdyr. Ine, olaryň käbiri:
Kanada: bu ýurda myhman bolanlar köplenç klýon agajynyň şiresini satyn alýarlar. Ýurtda agajyň bu görnüşi örän ýaýran bolup, döwlet baýdagyny hem klýonyň ýapragy bezeýär.
Ýamaýka: Merkezi Amerika we ekwator guşaklygyna ýakyn ýurtlara barýan myhmanlar köplenç kofe satyn alyp gaýtmagy kem görenoklar. Sebäbi iň gowy hilli kofe bu ýurtlarda ösdürilip ýetişdirilýär. Bu ugurda Ýamaýka öňdeligi eýeleýär. “Blue Mountain” atly kofe iň gowy kofe görnüşi hasaplanýar.
Belgiýa, Fransiýa we Niderlandlar
Bu ýurtlara baryp şokolad alyp gaýtmaýan gaty az.
Latwiýa, Litwa we Polşa
Bu ýurtlaryň myhmanlary köplenç zergärçilik önümlerini satyn alýarlar.
Horwatiýa
Lawanda.
Türkiýe
Türkiýede iň köp satylýan sowgatlyk haryt gözmonjuk.
Ýaponiýa
Sowgatlyk harytlar şol ýurduň medeniýeti bilen baglanyşykly bolýar. Günüň dogýan ýurdunyň myhmanlary origami kagyzyny satyn alýarlar.
Angliýa
Dünýäde iň köp ýagyn ýagýan ýurtlaryň biri hasaplanýar. Şol sebäpli bu ýerde saýawanlar gündelik durmuşyň bir bölegine öwrülen. Şeýle bolansoň, bu ýurduň myhmanlary öz göwünlerindäki ýaly saýawany tapyp bilýärler.
Koreýa Respublikasy
Dünýäde ýaponlaryň çaý içişlik dabarasy has meşhurlyk gazanan hem bolsa, bu däp koreý medeniýetinde hem uly orun tutýar. Ýurtdaky sowgatlyk dükanlaryň iň geçginli harydy bolsa bu ýurda mahsus bolan böwri tutawaçly çäýnek we dik edilip ýasalan käse.
