“Garagum-Ulag” Hojalyk Jemgyýeti Ýaponiýanyň dünýä belli awtoulag öndürijisi “Тоyoта”-nyň “Land Cruiser” modeliniň täze nusgasyny tanyşdyrdy. “Toyota Land Cruiser 300” atly täze modeliň tanyşdyrylyşy Aşgabat şäheriniň Oguz han şaýolunyň ugrunda ýerleşýän sergi zalynda geçirildi. Ýokary derejede guralan tanyşdyrylyş dabarasynda “Garagum-Ulag” Hojalyk Jemgyýetiniň ýolbaşçysy çykyş edip, ýurdumyzda telekeçileriň zähmet çekmegi üçin döredilýän mümkinçilikler üçin hormatly Prezidentimize hoşallyk bildirdi. Dabaranyň ahyrynda ýapon brendiniň soňky ulagy bolan, dünýäde ygtybarlylygy babatda ykrar edilen “Toyota Land Cruiser 300” ulagy köpçülige görkezildi. 2007-nji ýyldan bäri öndürilýän “Toyota Land Cruiser 200” ulagynyň nobatdaky nesli bolan täze ulag daşky dizaýny we içki multimediýa ulgamy bilen tapawutlanýar.
70 ýyllygyna bagyşlanan model
Bu ulag modeliň 70 ýyllygyna bagyşlanyp, ýörite öndürilipdir. Ady rowaýata öwrülen “Toyota Land Cruiser” 1951-nji ýylda öndürilip başlandy we 70 ýyldan gowrak wagtyň dowamynda dünýäde bu awtoulaglaryň 10 milliondan gowragy satyldy. Bu awtoulagyň täze nesli has amatly bolup, kaşaňlygy we ykjamlygy bilen tapawutlanýar. “Land Cruiser”-iň salonyndaky täzelikleriň arasynda üç ölçegli grafika bilen 12,3 dýuýmlyk multimediýa monitory, 9 dýuýmlyk sanly gural paneli, yzdaky ýolagçylar üçin güýmenje ulgamly monitor, şeýle hem hemme taraplaýyn görmek üçin kameralar göz öňünde tutulypdyr. Mundan başga-da, smartfonlar üçin simsiz zarýad, ähli oturgyçlar üçin howa çalşygy, yz tarapda ýuwujyly kamera, USB portlary we beýleki innowatiw ulgamlar bar.
Umuman aýdanyňda, “Toyota” toparynyň tagallasy bilen ýerli howa üçin uýgunlaşdyrylan awtoulaglar Türkmenistana getirildi. Sargyt eden ýurduň ady ulagyň penjiresine ýapyşdyrylan zawodyň etiketkasynda görkezilýär.
Bu ulagyň muşdaklary dünýäde az däl. Emma täze ulaga welin gyzyklanma örän ýokary. Şeýle bolansoň, müşderiler “Land Cruiser 300” modelini almak üçin 3-4 aý öňünden sargyt etmeli bolýarlar.
Ýeri gelende aýtsak, täze modeliň tanyşdyrlyşy dünýä ýurtlary bilen birwagtda amala aşyryldy.
