Halkara Pul Gaznasy (HPG) 2021-nji ýylda dünýä ykdysadyýeti barada täze maglumat ýaýratdy. Maglumatda aprel aýyndan bäri ýurtlaryň ykdysady ösüşi baradaky çaklamalaryň üýtgändigi mälim edildi. Bilermenler global ykdysadyýetiň 2021-nji ýylda 6 göterim ösmegine garaşýar. Mundan ozal 4,4 göterim diýlip kesgitlenen 2022-nji ýyldaky ösüş 4,9 göterime ýetirilipdir. Halkara gaznanyň bilermenleri şu ýyl ösen ýurtlaryň 5,6 göterim, ösüp barýan ýurtlaryň 6,3 göterim ösüş gazanjakdygyny belleýär. Maglumatda 2022-nji ýyldan başlap, birnäçe ýurduň ykdysady görkezijisiniň pandemiýadan öňki ýagdaýa ýetmegine garaşylýandygy bellenildi. HPG-niň maglumatlarynda käbir ýurtlaryň ösüşi baradaky çaklamalar hem görkezildi. ABŞ-nyň ykdysadyýetiniň 2021-nji ýyldaky ösüşi baradaky çaklama 6,4 göterimden 7 göterime çykarylypdyr. Bu görkeziji 2022-nji ýyl üçin 3,5 göterimden 4,9 göterime ýetirilipdir.
Ýewro sebitinde bolsa bu ýylky ösüşiň ozalky çaklamadaky 4,4 göterim däl-de, 4,6 göterim bolmagyna garaşylýar. Geljek ýyldaky ösüş 3,8 göterimden 4,3 göterime ýetirilipdir.
Ýewropanyň ykdysady taýdan öňdebaryjy ýurdy bolan Germaniýanyň 2021-nji ýylda 3,6 göterim, Fransiýanyň 5,8 göterim, Italiýanyň 4,9 göterim ösmegine garaşylýar. Ispaniýanyň ösüşiniň 6,2 göterim bolmagyna garaşylýar. Angliýanyň ykdysadyýetiniň ösüşi mundan ozal 5,3 göterim diýlip çak edilen bolsa, soňky maglumatda 7 göterime ýetirilipdir. Bilermenler 2022-nji ýylda bu görkezijiniň 4,8 bolmagyna garaşýarlar. Ykdysady taýdan ösen ýurtlaryň biri bolan Hytaýda 2021-nji ýylda 8,1 göterim, indiki ýyl bolsa 5,7 göterim ösüşe garaşylýar. Hindistanda bu görkeziji 2021-nji ýylda 9,5 göterim, geljek ýyl bolsa 8,5 göterim bolar.
