Ussat tälimçi, dünýä belli futbol hünärmeni Gurban Berdiýew şu gün 69 ýaşaýar. 1952-nji ýylyň 25-nji awgustynda gözel paýtagtymyz Aşgabatda dünýä inen Gurban Berdiýew karýerasyna 1971-nji ýylda şol wagtky “Kolhozçy” klubunda başlaýar. Ol bu toparda 1977-nji ýyla çenli çykyş edýär. Gurban Berdiýew 1977/1978 möwsüminde Gazagystanyň “Kaýrat”, soňra ýene-de 1 möwsüm “Kolhozçyda” oýnaýar. Soňra Russiýanyň Rostow-na-Donuň SKA (1979/80) hem-de “Rostselmaşda”, häzirki “Rostowda” (1980/81) klublarynyň hersinde 1 möwsüm çykyş edýär. 1981-nji ýylda täzeden “Kaýrata” dolanan Gurban Berdiýew 1985-nji ýyla çenli, ýagny professional karýerasyny tamamlaýança bu toparyň köýnekçesini geýýär. Ýarymgoragçy bolup oýnan Gurban Berdiýew 400-e golaý duşuşykda 60 töweregi gol geçirýär. Ol futboly taşlanyndan bir ýyl soň dessine tälimçilige baş goşýar. Onuň tälimçilikdäki ilkinji duralgasy Gazagystanyň Jambyl şäheriniň “Himik” topary bolýar (1986). Berdiýew bu topara 3 ýyllap tälim berýär. Soňra 1991–1993-nji ýyllar aralygynda Gazagystanyň başga bir topary “Taras” klubunda tälimçi bolup işleýär. Ol 1993-1994 möwsümnde Türkiýäniň “Gençlerbirligi” toparynda gysga döwürlik tälimçi bolýar.
2000-nji ýyla çenli “Kaýrat” (1994/95), “Kaspi” (1996/97), Aşgabadyň “Nisa” (1998/99), toparlaryna, 1999-njy ýylda-da az wagtlyk Türkmenistanyň milli ýygyndysyna tälim berýär. Berdiýew “Nisa” toapry bilen Türkmenistanyň çempionatynda hem-de Türkmenistanyň Kubogy ýaryşynda çempionlyk gazanýar.
“BARSELONANY” “KAMP NOUDA” ÝEŇÝÄR
Täze asyra geçip has tejribe toplan Gurban Berdiýew 2000-2001 möwsüminde Russiýanyň Smolensk şäheriniň “Kristall” (1-nji liga) toparynda işläp başlaýar. Bir möwsümden soň, ýagny 2001-nji ýyldan başlabam, 11 ýyllap özüne tutuş dünýäde uly şöhrat getiren “Rubin” toparynyň tälimçisi bolýar. Ilki topary ýokary liga çykaran Berdiýew ilkinji möwsüminde “Premýer ligany” 3-nji orunda tamamlaýar. 2008-nji we 2009-njy ýyllarda bolsa, “Rubine” Russiýanyň “Premýer ligasynda” yzly-yzyna 2 çempionlyk gazandyrýar. Bu diňe bir Russiýanyň futbol taryhynda däl, eýsem, dünýä futbolynyň taryhynda-da garaşylmadyk ýeňişleriň biri bolýar. 2010-njy ýylda 3-nji ýeri eýelän “Rubin” bilen ol Çempionlar ligasynda ýatdan çykmajak ýeňişler gazanýar. “Barselonany” myhmançylykda 2-1 ýeňip, bütin dünýäniň ünsüni özüne çekýär. Öz meýdançasynda toparçadaky 3 klubdanam – “Inter”, “Barselona”, “Dinamo Kiýew” klublaryndan ýeňilmeýär.
2009-njy ýylda Russiýada ýylyň tälimçisi saýlanan Berdiýew “Rubinde” işlän ýyllarynda çempionlykdan daşgary, Russiýanyň Kubogyna 1, Super Kubogyna-da 2 gezek mynasyp bolýar.
2013-nji ýylda “Rubini” Ýewropa ligasynda çärýek finala çykarýar. Möwsümiň ahyrynda-da topardaky wezipesini taşlaýar. Soňra 1 ýyllyk dynç alyşdan soň, “Rostow” toparynyň tälimçiligine bellenýär bu klub bilenem UEFA-nyň ýaryşynda ýatdan çykmajak duşuşyklary başdan geçirýär. 2015/2016 möwsüminde “Premýer ligany” 2-nji orunda tamamlan “Rostow” Çempionlar ligasyna wekilçilik edýär. Topar öz meýdançasynda “Aýaks”, “Bawariýa” ýaly klublary ýeňýär. 3 möwsümden soň, täzeden “Rubine” dolanan Gurban Berdiýew 2019-njy ýylyň maýynda-da topar bilen hoşlaşýar. Wagtal-wagtal Ýewropanyň, Russiýanyň öňdebaryjy klublary bilen ady agzalan Gurban Berdiýew şu ýylyň maý aýynda-da ozalky topary “Kaýratda” maslahatçy bolup işe başlaýar. Ine düýnki günem, doglan gününden bir gün öň bolsa, ol “Kaýrat” toparynyň tälimçisi wezipesine bellenilýär. Bizem öz gezegimizden ussat tälimçä uzak ýaş arzuw edýäris.
