UEFA Çempionlar ligasynda “G” toparçada Sewilýa öz meýdançasynda Salsburg bilen 1-1 deňme-deň oýnady. 1-1 hasabynda deňlikde tamamlanan oýun birinji ýarymda belarusly emin Alekseý Kulbakowyň bellän 4 penalti urgusy bilen rekord goýdy. 12-nji minutda Karim Adeýeminiň garşysyna gödeklige ýol berildi. Eminiň bellän penalti urgusyny Adeýeminiň özi urup, ol ony meýdançanyň daşyna gönükdirdi. 20-nji minutda bu gezek Nawas ýene-de Adeýemini jerime meýdançasynda ýykdy. Bu gezek penaltini Luka Susiç urup, ol dürs urgy bilen hasaby açdy. 36-njy minutda Bono ýene-de Adeýeminiň garşysyna gödeklige ýol berdi. Emin ikirjiňlenmän 3-nji gezek şol bir derwezäniň garşysyna penalti urgusyny belledi. Ýöne Susiçiň bu gezekki urgusy sag sütüne degip, yzyna gaýtdy. Adeýemi ÇL—de bir oýunda toparyna 3 penalti gazandyran ilkinji oýunçy boldy. Duşuşykda penalti urgularynyň birine ýene biri goşulyp, emin VAR-yň maslahaty boýunça 42-nji minutda ýene-de birini belledi. Ýöne bu gezek Sewilýanyň peýdasyna bellenen bu urguny Iwan Rakitiç dürs urmagy başardy. Bu gol Sewilýanyň Ýewrokuboklardaky 100-nji goly hökmünde hasaba alyndy. Oýnuň 2-nji ýarymynda 2-nji sarysyny alan En-Nesiri gyzyl kart alyp, meýdançadan çykaryldy. Şeýlelikde, Çempionlar ligasynyň iň köp penalti bellenen oýny hökmünde taryha giren bu duşuşyk 1-1 deňlikde tamamlandy.
Toparçadaky beýleki oýun – Lill – Wolfsburg duşuşygynda hasap açylmady.
