Ispaniýanyň çempionaty La Ligada 5-nji tapgyryň merkezi duşuşygynda Walensiýa bilen Real Madrid toparlary duşuşdylar. Çekeleşikli geçen oýunda ýer eýeleri 66-njy minutda Hugo Duronyň goly bilen öňe saýlandy. Ýöne ruhdan düşmedik madridliler soňky 5 minutda geçiren 2 goly bilen ýeňiş gazanmagy başardy. Reala ýeňiş getiren gollary 86-njy minutda Benzemanyň pasyndan soň Junior, 89-njy minutda-da Junioryň pasyndan soň Benzema derwezä girizdi. Şeýlelikde, Real Madrid 13 utuk bilen ýeňlişsiz liderligini dowam etdirdi.
La Ligada soňky çempion Atletiko Madrid öz meýdançasynda Atletik Bilbao bilen golsuz deňme-deň oýnady. Şeýle-de öňdäki orunlary gyzyklandyrýan ýene bir oýun – Real Sosiedad-Sewilýa duşuşygynda-da hasap açylmady. La Ligada 5-nji tapgyr şu günki Barselona-Granada duşuşygy bilen jemlener.
La Ligada 6-njy tapgyryň oýunlary-da şu hepdäniň dowamynda ýagny 21-22-23-nji sentýabrda oýnalar.
