25-nji sentýabrda Aşgabatda ýurduň Garaşsyzlygynyň 30 ýyllygyna bagyşlanyp, Türkmenistanyň Prezidenti, Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň mejlisi geçirildi. Maslahatda döwlet Baştutany çykyş edip, ýurduň sosial-ykdysady ösüşiniň Garaşsyzlyk ýyllary içindäki ösüşiniň netijelerini jemledi. Türkmen lideriniň pikiriçe, bu döwürde demokratik, kanuny we dünýewi döwlet üçin berk binýat goýuldy. Bu döwürde döwlet gurluşyny kesgitleýän Türkmenistanyň Konstitusiýasy kabul edildi.
Ýurduň ykdysady ösüşi barada durup geçen Türkmenistanyň Prezidenti Gurbanguly Berdimuhamedow, soňky 30 ýylda Türkmenistanyň ykdysadyýetine goýulan maýa goýumlarynyň ABŞ-nyň 200 milliard dollaryndan gowrakdygyny aýtdy. Bu serişdeleriň 60 göteriminden gowragy senagat pudagyny ösdürmäge gönükdirildi we daşary ýurt maýasynyň umumy mukdaryndaky paýy 15 göterime golaýdyr. Şeýle hem, döwlet baştutany “adam maýasyny” ösdürmek üçin ylym, bilim we saglygy goraýyş üçin ep-esli serişdeleriň bölünip berlendigini aýtdy.
Prezident Gurbanguly Berdimuhamedow häzirki wagtda ýurtda umumy bahasy ABŞ-nyň 37 milliard dollaryndan gowrak 2,5 müň töweregi uly taslamanyň amala aşyrylýandygyny belledi.
Döwlet Baştutany, Bitarap kanuny derejesine, amatly geosyýasy ornuna, baý çig mal ätiýaçlyklaryna we güýçli adam potensialyna esaslanýan Türkmenistanyň ýakyn wagtda senagat taýdan ösen ýurtlaryň birine öwrüljekdigine ynam bildirdi.
Maslahatda Prezident Gurbanguly Berdimuhamedow Türkmenistanyň Garaşsyzlygynyň 30 ýyllygy mynasybetli zähmetde tapawutlanan raýatlara döwlet baýraklaryny bermek baradaky birnäçe Karara gol çekdi. Milli Liderimiz Halk Maslahatynyň mejlisiniň dowamynda Çynar Rustemowa ýokary tapawutlandyryş derejesi bolan «Türkmenistanyň Gahrymany» diýen ady dakmak barada karara gelendigini aýtdy. Hormatly Prezidentimiz Gurbanguly Berdimuhamedowyň belleýşi ýaly, häzirki döwürde BMG-niň Bilim, ylym we medeniýet boýunça guramasynyň (ÝUNESKO-nyň) işleri barada Türkmenistanyň milli toparynyň jogapkär sekretary bolup işleýän Çynar Rustemowa ýurdumyzyň Daşary işler ministrliginiň ulgamynda köp ýyllaryň dowamynda zähmet çekip, berkarar Watanymyzyň özygtyýarlylygyny, konstitusion gurluşyny we döwlet Garaşsyzlygyny, hemişelik Bitaraplygyny pugtalandyrmaga uly şahsy goşant goşdy. Şoňa görä-de, ata Watanymyzyň hem-de merdana halkymyzyň öňünde bitiren aýratyn görnükli hyzmatlaryny we gazanan üstünliklerini, şeýle hem uzak ýyllaryň dowamynda çeken yhlasly we tutanýerli zähmetini nazara alyp, oňa ýurdumyzyň iň ýokary tapawutlandyryş derejesini — «Türkmenistanyň Gahrymany» diýen ady dakmak we «Altyn Aý» altyn medalyny gowşurmak barada karara geldik diýip, milli Liderimiz degişli Permana gol çekdi. Mejlise gatnaşyjylaryň el çarpyşmalary astynda Türkmenistanyň Prezidenti, Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Çynar Rustemowa ýokary döwlet sylagyny dabaraly ýagdaýda gowşuryp, ony bu şanly waka bilen gutlady.
Soňra hormatly Prezidentimiz nobatdaky kitabyny ýazyp gutarandygyny hem-de ony «Garaşsyzlyk – bagtymyz» diýip atlandyrandygyny aýtdy. Milli Liderimiziň belleýşi ýaly, Garaşsyzlyk hiç zat bilen ölçäp bolmaýan beýik düşünjedir, döwletimiziň, halkymyzyň agzybirliginiň we bitewüliginiň berk esasydyr. Çuň manyly bu sözde merdana ata-babalarymyzyň erkin, bagtyýar durmuş baradaky arzuw-islegleri, şöhratly geçmişimiz, şu günümiz hem-de mähriban Watanymyzyň beýik geljegi beýan edilýär. Kitapda dünýäniň ähli ýurtlaryny birleşdirmäge gönükdirilen belent maksatlary mundan beýläk-de amala aşyrmagyň mümkinçilikleri hemmetaraplaýyn seljerildi. Bu kitap parahatçylygyň, öňe gitmegiň we ähli adamzadyň ýagty geljeginiň hatyrasyna halklary birleşdirýän ideýalaryň üýtgewsiz ähmiýetini okyjylara açyp görkezýär. Bu barada aýtmak bilen, hormatly Prezidentimiz täze eseriň gyzykly hem-de peýdaly, Türkmenistanyň Garaşsyzlygynyň 30 ýyllyk ýubileýine sowgat boljakdygyna ynam bildirdi we hemmeleri şanly sene bilen ýene-de bir gezek tüýs ýürekden mähirli gutlady.
Halk Maslahatynyň mejlisi tamamlanandan soň, hormatly Prezidentimiz Gurbanguly Berdimuhamedowa Milli Geňeşiň Mejlisiniň kararyna laýyklykda, «Türkmenistanyň Garaşsyzlygynyň 30 ýyllygyna» atly ýubileý medalyny we ýadygärlik nyşany bolan Altyn şaý milli manadymyzy gowşurmak dabarasy boldy.
Soňra hormatly Prezidentimiz Gurbanguly Berdimuhamedow Hökümet agzalaryna, Türkmenistanyň Milli Geňeşiniň Mejlisiniň Başlygyna hem-de Halk Maslahatynyň Başlygynyň orunbasaryna «Türkmenistanyň Garaşsyzlygynyň 30 ýyllygyna» atly ýubileý medalyny we ýadygärlik nyşanyny gowşurdy.
