Öz döwründe hemmäniň uly söýgüsini gazanan we häzirki wagtda-da öz modasyny ýitirmän gelýän Gladiator filminiň dowamyny surata düşürmäge taýýarlyk görülýär. Bu barada filmi surata düşüren meşhur režissýor Ridli Skott gürrüň berdi. Ol ikinji filmiň ssenarisiniň ýazylyp başlandygyny belläp geçdi. Filmiň ssenarisi “Top Gun: Maverick” filminiň ssenariçisi Piter Kreýg tarapyndan ýazylýar. Ussat režissýor Gladiator 2 filminiň surata düşüriliş işlerine häzirki wagtda önümçiligi dowam edýän Kitbag kinosynyň işleriniň tamamlanmagyndan soň başlanjakdygyny aýtdy. Täze filmdäki wakalar birinji kinoda bolup geçen hadysalardan 20 ýyl soň bolup geçýär. Täze filmde Luçillanyň (Konni Nilsen) ogly Luşius barada bolar. Ol birinji filmde öldürilen Maksimusyň (Rassel Krow) ogly, şol sanda Kommodusyň (Hoakin Finiks) hem ýegenidir.
Ýeri gelende aýtsak, Gladiator filmi 2000-nji ýylda ekranlara çykarylyp, 103 million dollar býujetli kino prokatdan 460,5 million dollar gazanypdy. 73-nji Akademiýa baýraklarynda 12 ugurda dalaşgär görkezilen kino iň gowy film, iň gowy aktýor (Rassel Krow), iň gowy grim, iň gowy ses hem-de iň gowy wizual effekt ugurlary boýunça jemi 5 Oskar baýragyny gazanypdy.
