Dünýäde emele gelen ýagdaý sebäpli adam hereketiniň azalmagy tebigata oňyn täsir etdi. Mundan ozal köp ýerde deňiz kenarlarynda birnäçe ýyldan bäri göze görünmeýän jandarlar peýda bolup başlapdy. Indi bolsa, guşlaryň şäher merkezlerine göçüp gelendigi anyklandy. Kanadada we ABŞ-da geçirilen ylmy barlaglaryň netijesinde guşlaryň şähere has golaý gelendikleri ýüze çykaryldy. Pandemiýadan ozal şäher merkezinde göze ilmeýän guşlaryň adamlaryň ýaşaýan ýerinde has köp görnüp başlandygy anyklandy. Kanadanyň Manitoba uniwersitetiniň hem-de Nýu-Ýorkdaky Kornelliň adyny göterýän Ornitologiýa laboratoriýasynyň hünärmenleri 2017-2020-nji ýyllar aralygynda mart-maý aýlarynda 4,3 million guş baradaky toplanan maglumatlary öwrendiler. Netijede pandemiýa döwründe öwrenilen 82 guşuň 80 göteriminiň pandemiýadan ozalky döwre garanyňda şäherlere, şäherara awtoýollara, aeroportlara we adamlaryň ýaşaýan beýleki ýerlerine has golaý gelendikleri ýüze çykaryldy. Manitoba uniwersitetiniň ylmy işgäri Nikola Koper has köp guş görnüşiniň adamlaryň ýaşaýan ýerinde köp görnüp başlandygyny belleýär. Koper köçä çykmagyň çäklendirilen döwründe ýol hereketiniň azalmagynyň tebigata beýle täsir edip biljekdigine garaşmandygyny aýdýar. Guşlaryň käbir görnüşi howa menzilleriniň golaýynda-da peýda bolup başlapdyr.
