Parahatçylyk boýunça Nobel baýragy 2021-nji ýylda Russiýanyň jemgyýetçilik-syýasy gazeti “Nowaýa gazeta”-nyň baş redaktory Dmitriý Muratowa we amerikan-filippin žurnalisti Mariýa Ressa berildi. Komitet bu baýragyň olara “demokratiýanyň we parahatçylygyň hökmany şerti bolan söz azatlygyny goramak ugrundaky tagallalary” üçin mynasyp bolandygyny belläp geçdi.
Dmitriý Muratow Parahatçylyk baýragyna mynasyp bolan üçünji rus raýaty boldy – ondan ozal adam hukuklary aktiwisti Andreý Saharow we SSSR-iň ilkinji prezidenti Mihail Gorbaçýow bu baýraga mynasyp bolupdy. Baýrak eýeleriniň atlary Norwegiýanyň Nobel institutynda mälim edildi.
Nobel komitetiniň maglumatlaryna görä, sanawda 329 dalaşgär – 234 adam we 95 gurama bar. 2020-nji ýylda BMG-niň Bütindünýä azyk maksatnamasy bu baýraga mynasyp bolupdy.
Fiziologiýa we lukmançylyk, fizika, himiýa, edebiýat we ykdysadyýet boýunça baýraklar Şwesiýanyň paýtagty Stokgolmda berilýär. Parahatçylyk baýragy bolsa, Norwegiýanyň paýtagty Osloda gowşurylýar. Baýrak 1901-nji ýyldan bäri berlip, jemgyýetçilik-syýasy, ynsanperwer ugurlarda iň abraýly halkara baýraklaryň biri bolup durýar.
