Ispaniýanyň çempionaty La Ligada Barselona myhmançylykda Raýo Wallekanodan 1-0 asgyn geldi. Ýer eýelerine ýeňiş getiren ýeke-täk goly 30-njy minutda Radamel Falkao geçirdi. Oýnuň 72-nji minutynda Memfis Depaýyň depen penalti urgusyny derwezeçi çykarmagy başardy. Şeýlelikde, El Klasikodan soň, Raýo Wallekanodan hem utulan Barselona toparynda tälimçi Ronald Kuman wezipesinden boşadyldy. Barselonada 1,5 ýyl işlän Kuman 67 oýunda 37 ýeňiş gazanyp, 16 gezek ýeňildi (12 deňlik). Barselona Kumanyň tälimçiliginde Ispaniýanyň Şa Kubogyny gazandy.
Şu möwsümde 10 oýunda 4 gezek ýeňip, 3 gezek utulan Barselona 15 utuk bilen 9-njy ýerde barýar. Barselonada indiki tälimçi hökmünde toparyň ozalky oýunçylaryndan Hawi Hernandesiň ady agzalýar.
