Halkara kosmos bekedindäki laboratoriýada ylmy maksatlar bilen ekilen ajy çili burçunyň ilkinji hasyly alyndy. Hasylyň bir böleginden şol ýerde zähmet çekýän astronawtlar Meksikanyň milli tagamy bolan “tako” taýýarlap, iýdiler. Bir bölegi bolsa, ylmy taýdan öwrenilmek üçin Ýere iberiler. NASA bu ösümligiň ösdürilip ýetişdirilmeginiň iň kyn tejribeleriň biridigini belledi.
Bu ylmy iş NASA-nyň uzak möhletli kosmos missiýalarynda azyk önümlerini taýýarlamak meselesinde has köp maglumat toplamaga goşant goşar. Astronawt Megan MakArtur “Anna günüň zyýapaty! Hasyldan soňra gyzyl we ýaşyl çili (burç) datdyk. Yzyndan sowalnamany doldurdyk. Ahyrsoňy, iň gowy takolarymy taýýarladym: fažita eti, gaýtadan suwlanan pomidor, artişok we elin burç!” diýip ýazdy.
Mundan ozal NASA kosmosda grawitasiýanyň örän az bolan ýerinde ekmek üçin burçuň bu sortunyň saýlanandygyny, sebäbi, bu ösümligiň C witaminine baýdygyny, onuň şinelemeginiň, ulalmagynyň we düwmeginiň köp wagt alýandygyny, şol sebäpli onuň kosmosda ýetişdirilip bilinjek beýleki ösümliklerden has kyndygyny belläpdi.Burçuň tohumlary şu ýylyň iýul aýynda kosmosa iberilipdi. Sentýabr aýynyň başlarynda burçuň gülländigi mälim edilipdi.
Ýeriň orbitasynda hereket edýän Halkara kosmos bekediniň laboratoriýasynda mundan ozal hem birnäçe ösümligiň tohumy ekilip, ondan hasyl alnypdy.
