UEFA Çempionlar Ligasynda toparçalardaky 6-njy oýunlaryň deň ýarysy tamamlandy. “A” toparçada birinji orny ozal eýelän Mançester Siti myhmançylykda Leipsigden 2-1 hasabynda utuldy. Bu ýeňişden soň Leipsig topary ýoluny Ýewopa Ligasynda dowam etdirer. Toparçada beýleki duşuşykda PSŽ super ýyldyzlary Kilian Mbappe we Lionel Messiniň hersiniň 2 goly bilen Klub Brýuggeni 4-1 hasabynda utdy. Messi Çempionlar Ligasyndaky 51-nji oýnunda 30-31-nji gollaryny geçirdi. Çempionlar Ligasyndaky gollarynyň sany 125-e (154 oýunda) ýeten Lionel Messiniň 38-nji başga klubuň derwezesinden hem gol geçirmegi başardy. Başgaça aýdylanda Lionel Messiniň Çempionlar Ligasynda gol geçiren klublarynyň sany 38-e ýetip, ol bu babatda Kristiano Ronaldo bilen deňleşdi. Şeýle-de Messi bu ýaryşda 35-nji gezek 2 goldan geçirdi. Galyberse-de, Messi 22-nji gezek bu ýaryşda penalti urgusyny urup, Ronaldo bilen bu babatda hem deňleşdi. Messi şolaryň 18-sini, Ronaldo 19-syny gol geçirdi.
Kilian Mbappe welin 30 gola iň çalt ýeten ýaş futbolçy rekordyny Messiden aldy. Mbappe 22 ýaş 352 günde 30 gol geçirdi. Messi bolsa 23 ýaş 131 günde 30 gola ýetipdi.
