Ýylyň ahyrlap barýan şu günlerinde adaty kalendar senenamasy bilen baglanyşykly rekordlaryň yzy üzülenok. Germaniýanyň Bundesligasynda 17-nji tapgyrda Bawariýa öz meýdançasyna Wolfsburgy 4-0 hasabynda ýeňdi. Oýunda 7-nji minutda Tomas Müller hasaby açdy. Bu onuň Bawariýadaky 400-nji duşuşygy hökmünde hasaba alyndy. 57-nji minutda Apamekano hasaby 2-0-a çykardy. 59-njy minutda Sane hem-de 87-nji minutda Lewandowski tapawutlanyp, Bawariýa 4-0 hasabynda ýeňşini baýram etdi. Şeýlelikde, Lewandowski Bundesliganyň çäginde 2021-nji ýyldaky 43-nji goluny geçirip, rowaýaty Gerd Mülleriň 49 ýyllyk rekordyny täzeledi. Şeýle-de, polşaly hüjümçi 2021-nji ýyldaky soňky oýnunda tapawutlanyp, umumylykda (milli ýygyndy we klubda) 59-njy duşuşygynda 69-njy goluny geçirdi we bu ugurda Kristiano Ronaldo bilen deňleşdi. Mälim bolşy ýaly bir ýylyň dowamynda iň köp gol geçiren futbolçy Lionel Messi bolup, ol 2012-nji ýylda 91 goly derwezä girizipdi. Ronaldo 2013-nji ýylda 69 gezek tapawutlanypdy.
Bawariýa 17 tapgyryň netijesinde 56 gol geçirip, Bundesligada 17 tapgyrda şeýle netije görkezen ilkinji topar boldy.
