Soňky ýyllarda abraýy artýan Globe Soccer Awards baýraklarynyň bu ýylky eýeleri mälim edildi. Dubaýda geçirilen dabarada ýylyň futbolçysy diýlip PSŽ-niň fransiýaly ýyldyzy Kilian Mbappe saýlandy. Ýylyň tälimçisi Roberto Mançini, ýylyň goragçysy Leonardo Bonuççi, ýylyň derwezeçisi Janluiji Donnarumma diýlip ykrar edildi. Maradonanyň adyny göterýän ýylyň iň netijeli futbolçysy baýragyna Robert Lewandowski laýyk görüldi. Ol şol bir wagtyň özünde “Tiktok Fans” ýylyň futbolçysy baýragy bilen sylaglandy. Ähli döwürleriň iň netijeli hüjümçisi baýragy-da Kristiano Ronaldo gowşuryldy.
Ýylyň kluby Çelsi, ýylyň ýygyndy topary diýlip, Italiýanyň milli ýygyndysy saýlandy.
Ýylyň zenan futbolçysy ispaniýaly Aleksia Putellas, onuň çykyş edýän topary Barselona bolsa ýylyň zenan kluby baýraklaryna laýyk görüldi.
Braziliýaly ýyldyz futbolçy Ronaldinio başarnykly karýer baýragy bilen sylaglandy.
Globe Soccer Awards baýraklary 2010-njy ýyldan bäri gowşurylyp gelinýär. Baýrak arap işewürleriniň hemaýatkärliginde Ýewropanyň klub assosiasiýasy (ECA) hem-de Ýewropanyň futbolçy menejerler assosiasiýasy (EFAA) tarapyndan berilýär.
