Futbolyň iň uly ägirtlerinden hasaplanýan merhum Diego Maradonanyň inisi Hugo Maradona 52 ýaşynda aradan çykdy. 1969-njy ýylyň 9-njy maýynda dünýä inen Hugo Hernan Maradona infarkt sebäpli Napoliniň golaýynda ýerleşýän Monte di Prosida şäherinde dünýä bilen hoşlaşdy. El Turco lakamly futbolçy agasy Diegonyň futbolda ýeten sepgitlerinden juda pes hem bolsa-da Argentinos Juniors (Argentina), Askoli (Italiýa), Raýo Wallekano (Ispaniýa), Rapid Wien (Awstriýa), Deportiwo Italia (Wenesuela), Progreso (Urugwaý) ýaly klublarda hem-de Ýaponiýanyň PJM Futures, Awispa Fukuoka, Konsadlo Sappora toparlarynda oýnady. Maradonadan 9 ýaş kiçi bolan Hugo Argentinanyň U16 ýygyndysynda-da 1 duşuşyk geçirdi. Ýarymgoragda çykyş eden Hugo gysga wagtlyk Puerto Riko Aýlenders (Puerto Riko) toparyna tälim hem berdi.
Ýeri gelende aýtsak, Diego Armando Maradona 2020-nji ýylyň 25-nji noýabrynda 60 ýaşynda aradan çykypdy. Inisi Hugo bolsa merhum ýyldyzdan 13 aý soň ýagty jahan bilen hoşlaşdy.
