Angliýanyň çempionaty Premier Ligada 21-nji tapgyryň jemleýji duşuşygynda Mançester Ýunaýted öz meýdançasynda Wulwerhemptondan 1-0 asgyn geldi. Myhmanlaryň artykmaçlygynda geçen oýunda ýeke-täk goly 82-nji minutda Žoa Moutino derwezä girizdi. Ýer eýeleriniň galan minutlarda eden tagallalary hasaby deňlemäge ýeterlik bolmady. Şeýlelikde, Mançester Ýunaýted çempionatda Wulwerhemptondan öz meýdançasynda 1980-nji ýyldan soň ilkinji gezek utuldy. Ýagny Ýunaýted 42 ýylyň dowamynda Wulwerhemptony Old Traffordda 7 gezek ýeňip, olar bilen 3 sapar hem deňme-deň oýnady. 7-nji orunda barýan Mançester Ýunaýtediň 31 utugy bolup, ol sanawyň lideri Mançester Sitiden 22 utuk yza galdy.
Ragnigiň tälimçiliginde ilkinji gezek utulan Mançester Ýunaýtediň bu duşuşygynda Kristiano Ronaldo toparyň kapitany hökmünde meýdança çykdy. Ol 2008-nji ýyldan soň ilkinji gezek Ýunaýtede kapitanlyk etdi.
