Hollywood-yň meşhur aktýory Sidni Puatie (Sidney Poiter) 94 ýaşynda aradan çykdy. Ol iň gowy aktýor ugry boýunça Oskar alan ilkinji garaýagyz aktýor hökmünde tanalýar. 1927-nji ýylda Maýamide dünýä inen Puatieniň asly Bahamalardan bolup, ol kino sungatyna 1947-nji ýyldaky “Sepia Cinderella” filmi bilen aralaşýar. Şondan soň 50-den gowrak filmde ululy-kiçili keşpleri janlandyrýar. Ol 1958-nji ýyldaky “Boýun egmezekler” (The Defiant Ones) filmindäki keşbi üçin Oskara dalaşgär görkezilýär. Puatie bu filmdäki keşbi üçin BAFTA baýragyna laýyk görülýär. Ol “Liliýalar meýdany” (Lilies of the Field) atly filmindäki keşbi üçin iň gowy aktýor ugrundan Oskar baýragyny gazanýar. Sidni Puatie bu baýragy alan ilkinji garaýagyz aktýor hökmünde taryha girýär. Bu filmdäki keşp oňa Altyn globus heýkeljigini hem gazandyrýar. Iň gowy aktýor ugrundan Oskar alan ilkinji garaýagyz aktýor Denzel Waşingtonyň “meniň göreldäm” diýip, ýüzlenýän şahsyýeti bolan Puatie 2001-nji ýylda-da Oskaryň hormat sylagyna laýyk görülýär. Barak Obamanyň döwründe, has takygy, 2009-njy ýylda iň uly raýat nyşanlarynyň biri bolan Prezidentiň erkinlik medaly bilen sylaglanýar. 6 çaganyň kakasy Puatie 1997-2007-nji ýyllar aralygynda Bahamalaryň Ýaponiýadaky adatdan daşary ilçisi wezipesinde hem işledi. Aktýoryň meşhur kinolaryndan “No Way Out” (1950), “Go Man Go” (1954), “Blackboard Jungle” (1955), “Good-bye, My Lady” (1956), “Virgin Island” (1958), “Porgy and Bess” (1959), “All the Young Men” (1960), “A Raisin in the Sun” (1961), “The Long Ships” (1963), “A Patch of Blue” (1965), “To Sir, with Love” (1967), “For Love of Ivy” (1968) ýaly birnäçe filmi agzamak bolar.
