Tomusky transfer möwsüminde mejbury ýagdaýda Barselonadan PSŽ toparyna transfer bolan Lionel Messiniň parižlileriň düzümindäki görkezýän netijesi uly sowal astynda. Çempionlar Ligasyndaky oýunlarda (5 duşuşykda 5 gol) şowly çykyş etse-de, çempionatda barmak basyp görkezer ýaly hasabaty ýok. Onuň 12 oýunda bary-ýogy 1 gol geçirmegi metbugatyň üns merkezinden düşenok. Bu onuň karýerasyndaky iň şowsuz döwür hasaplanýar. Adatça La Ligada her möwsümde 25-30 gol geçirýän Messi Ligue 1-de meýdança çykan 12 duşuşygynda 44 urgy geçirip, diňe şolaryň birinde adyny skorborda ýazdyrdy. Bu görkeziji boýunça Lionel Messi Ýewropanyň TOP 5 çempionatynda diňe Mançester Sitiniň portugaliýaly goragçysy Žoao Kanselodan yza galýar. Edil Messi ýaly Kanselo hem Premier Ligada, ýagny çempionatda diňe bir gol geçirdi. Ýöne Kanselo Messä garanyňda 2 urgy artykmaç, ýagny derwezä tarap 46 urgy geçirdi.
