PDF
Kamerunda dowam edýän Afrika Milletler Kubogynda ýarym finalçylar belli boldy. Çärýek finalyň iň esasy duşuşygynda Müsür bilen Marokkonyň ýygyndylary duşuşdylar. Çekeleşikli geçen oýnuň ýeňijisi goşmaça wagtda belli bolup, müsürliler 2-1 hasabynda ýeňşini baýram etdi. Duşuşygyň 7-nji minutynda Marokkonyň ýygyndysy Sofiana Bufalyň penaltiden geçiren goly esasynda 1-0 öňe saýlandy. 2-nji ýarymda, has takygy, 53-nji minutda Mohamed Salah hasaby deňledi. Esasy wagty 1-1 gutaran oýnuň 100-nji minutynda Salahyň pasyndan soň Trezege Müsüriň ýygyndysyny öňe çykardy. Bu duşuşykda soňky gol bolup, marokkolylaryň hasaby deňlemek üçin eden tagallalary netije bermedi. Şeýlelikde, Müsüriň ýygyndysy 16-njy gezek ýarym finala çykdy.
Çärýek finalyň beýleki oýunlarynda-da ýer eýeleri Kamerun Toko Ekambiniň gollary bilen Gambiýany 2-0 ýeňdi. Senegalyň ýygyndysy Ekwator Gwineýasyny 3-1 hasabynda utdy. Tapgyryň garaşylmadyk netijesinde-de Burkino Faso Tunisi 1-0 hasabynda ýeňlişe sezewar edip, 4-nji gezek ýarym finalda oýnamaga hukuk gazandy.
Ýarym finalda Kamerun bilen Müsüriň, Burkino Faso bilenem Senegalyň ýygyndylary duşuşarlar. Ýarym final duşuşyklary 2–3-nji fewralda oýnalar.
