Dünýäde köp iş beriji pandemiýa döwründe işgärlerine uzakdan işlemek mümkinçiligini döretdi. Köp kompaniýa muny pandemiýadan soňra hem dowam etdirmek kararyna geldi. Käbirleri bolsa çeýe iş tertibine geçdi. Ýagny, iş wagty öňküsi ýaly irdenden agşama çenli däl-de, günüň bir salkynynda ýa-da hepdäniň belli günlerinde edara barmaly edildi. Emma pandemiýanyň täsiriniň azalmagy bilen dürli ýurtlarda hökümetler iş ýerleriniň açylmagyna rugsat berdi. Şeýle bolansoň, kompaniýalar hem ozalky düzgüne geçip başladylar. Şeýle kompaniýalaryň biri bolan “Microsoft” 28-nji fewralda şereketiň Waşingtondaky esasy ofisini doly açmagy meýilleşdirýär. “Microsoft”-yň wise-prezidenti we marketing bölüminiň başlygy Kris Kaposselanyň blogynda ýazan habaryna görä, King etrabynda immunizasiýa derejesiniň ýokary bolmagy sebäpli bu karary kabul edipdirler. Kompaniýa ofislerini diňe bir işgärleri üçin däl, eýsem myhmanlar üçin hem açar.
Şeýle hem “Meta” (Facebook”) 28-nji martda ofislerini açar we işgärlerinden sanjymyň üç dozasyny alan bolmagyny talap eder. “Apple” kompaniýasy hem sanjymyň üçünji dozasyny alanlaryň dükanlardaky we ofislerdäki iş orunlaryna dolanyp biljekdiklerini belleýär.
