Her ýylda geçirilýän “Ýylyň suwasty fotosuratçysy” bäsleşiginiň ýeňijisi belli boldy. Baş baýragy “Gijäniň ägirtleri bilen bilen tans etmek” atly işi bilen ispaniýaly Rafael Fernandez Kaballero mynasyp boldy. Maldiw adalarynyň golaýynda çekilen suratda gämiden berilýän iýmiti iýmäge gelen 5 sany uly akula bar. Kaballero deňizlerde barlag geçirýän hünärmenler bilen suwuň aşagyna çümüpdir. Gämiden bolsa deňiz jandarlaryna iýmit taşlanypdyr. Bu iými iýmägi ilki bir sany akula gelipdir. Soňra olaryň sany gysga wagtda artypdyr.
Ozal bu baýraga mynasyp bolan Aleks Mustard fotosurat üçin ýagtylygyň gerekdigini, garaňkyda şeýle suraty alyp bilmegiň uly başarnykdygyny aýdyp, birinji bolan surata ýokary baha berýär.
Fotosurat bäsleşigine dünýäniň 71 döwletinden 4 müň 200 surat iberilipdir. Şeýle ýaryşlar 1965-nji ýyldan bäri geçirilýär. Bu bäsleşige ummanlaryň, deňizleriň kölleriň hatda ýüzülýän howuzlaryň aşagynda düşürilen suratlar iberilýär.
Aýsoltan Orazmyradowa,
Halkara ynsanperwer ylymlary we ösüş uniwersitetiniň talyby
