Hytaýyň paýtagty Pekinde 16 günläp dowam eden XXIV gyşky Olimpiýa oýunlary Guş höwürtgesi stadionynda geçirilen ýapylyş dabarasyndan soň tamamlandy. Gyşky sport görnüşleriniň umumylykda 15 ugry boýunça 91 ýurtdan 2871 türgeniň gatnaşan sport baýramçylygynda medallaryň sanawynda Norwegiýanyň ýygyndysy birinji orny eýeledi. Olar yzly-yzyna 2-nji, umumylykda-da 9-njy gezek medal sanawyny birinjilik bilen tamamladylar. Norwegiýaly Olimpiýaçylar 16 altyn, 8 kümüş, 13 bürünç, jemi 37 medal gazandylar. Norwegiýanyň ýygyndysy 16 altyn medal bilen bir gyşky Olimpiýa oýunlarynda iň köp altyn medal alan ýurt boldy.
Medal sanawynda germaniýaly türgenler 12 altyn, 10 kümüş, 5 bürünç, jemi 27 medala eýelik edip, 2-nji orny eýelediler. Soňky günlerde medallarynyň sanyny artdyran hytaýly olimpiýaçylar ABŞ-ly türgenlerden öňe saýlanyp, Pekin 2022-ni 3-nji orunda tamamladylar. Olar 9 altyn, 4 kümüş, 2 bürünç, jemi 15 medal gazandylar.
Jemi 29 ýurduň türgenleri medal gazanyp, şolardan 23-sini wekili azyndan bir altyn medala mynasyp boldy.
Gyşky Olimpiýa oýunlarynyň nobatdakysy, has takygy, XXV gşky Olimpiýa oýunlary 2026-njy ýylda Italiýanyň Milan hem-de Kortina d’Ampezzo şäherlerinde geçiriler. Ýapylyş dabarasynyň ahyrynda Halkara Olimpiýa Komitetiniň başlygy Olimpiýa baýdagyny italýan şäherleriniň degişli ýolbaşçylaryna gowşurdy.
Şeýlelikde, Pekin şäheri taryhda tomusky Olimpiýa oýunlaryndan soň, gyşky Olimpiýa oýunlaryny hem guran ilkinji şäher boldy.
