“Disney” kompaniýasy ABŞ-da ýaşaýyş jaýlaryny bina eder, olaryň ilkinjisiniň Kaliforniýada gurulmagy meýilleşdirilýär. Bu barada mälim eden “Disney” seýilgähleriniň bölüm müdiri Joş D’Amero häzirki wagtda “Disney”-iň jadyly dünýäsini ýüze çykarmagyň täze we tolgundyryjy usullarynyň taýýarlanýandygyny habar berdi. Gozgalmaýan emläk bazaryna girýän “Disney” güýmenje kompaniýasynyň bu meýilnamasy “Storyliving by Disney” diýlip atlandyrylyp, olaryň ilkinjisi Walt Disneýiň Kaliforniýadaky öýüniň ýerleşýän ýeri “Murry Ranch” sebitinde gurlar. Ilkinji ýaşaýyş jaýyň gurluşygy “Coutino” diýlip atlandyrylyp, dürli ýaşdaky adamlara, käbir beýleki ýerler bolsa, 55 we ondan uly ýaşdaky muşdaklaryna hödürlener. Bu ýerler ýaşaýjylaryň täze dostlaryny tapyp, umumy gyzyklanmalary tapyp biler ýaly derejede hem-de “Disney”-iň aýratynlyklary göz öňünde tutulyp taslanar.
– Biz kompaniýanyň ikinji ýüzýyllyga gadam basmagyna taýýarlyk görýän döwrümizde “Disney”-iň özüne çekijiligini nirede bolsa-da adamlara ýetirmegiň täze we tolgundyryjy tärleriniň üstünde işleýäris. Indi bir asyr töweregi wagt bäri “Disney” dünýädäki adamlaryň ýüregine we ruhuna täsir edýän wakalary paýlaşýar – diýip, “Disney” seýilgähleriniň, “Experiences and Products” bölüminiň başlygy Joş D’Amero aýtdy.
“Disney” ýaşaýjylaryň meýletinçi bolmagy üçin çäreleri, seminarlary we taslamalary hödürlär. Şeýle-de bolsa, kärendeçilerden ýeňilliklerden peýdalanýandyklary üçin ýörite ýaşaýyş jaý tölegi soralar. Jaýlaryň meýilleşdirilen bahalary yglan edilmedi, ýöne “Disney”-iň metbugat sekretary olaryň potratçy tarapyndan kesgitlenjekdigini we bazar şertlerine esaslanjakdygyny aýtdy.
“Walt Disney” kompaniýasy dünýädäki iň uly güýmenje toparlaryndan biridir. Bu kompaniýa doganlar Walter Elaýas we Roý Oliwer Disneý tarapyndan 1923-nji ýylyň 16-njy oktýabrynda kiçi animasiýa studiýasy hökmünde döredilip, häzirki wagtda iň uly transmilli media korporasiýalarynyň biri hem-de Golliwudyň iň uly studiýalarynyň biri hökmünde tanalýar. Mundan başga-da kompaniýa 11 sany güýmenje seýilgähiniň we iki sany akwaparkyň eýesi bolup, Amerikanyň teleradioýaýlymlar kompaniýasy (ABC) ýaly birnäçe teleýaýlym we radio ýaýlym ulgamyna eýeçilik edýär.
