Futbol boýunça zenan ýygyndylaryň arasynda geçirilýän “SheBelieves Cup” ýaryşynda täsin waka boldy. ABŞ-nyň futbol federasiýasy tarapyndan ABŞ-da guralýan ýaryş şu ýyl 7-nji gezek geçirilýär. 4 toparyň gatnaşýan ýaryşynda ABŞ-nyň ýygyndysy Kaliforniýada oýnalan oýunda Täze Zelandiýanyň ýygyndysyndan 5-0 üstün çykdy. Duşuşykda ilkinji 3 goly Täze Zelandiýanyň goragçysy 5-nji belgide çykyş eden Meýkaýla Mur öz derwezesinden geçirdi. Liwerpuluň zenanlar toparynda oýnaýan 25 ýaşly goragçy eýýäm 5-6-njy minutlarda, ýagny 1 minutyň dowamynda 2 gezek pökgini ýalňyşlyk bilen öz derwezesinden girizdi. Ol 36-njy minutda-da ýene bir topy öz derwezesinden geçirdi. 5-0 hasabynda amerikanlaryň ýeňşi bilen tamamlanan oýnuň 40-njy minutynda tälimçisi ony meýdançadan çykaryp, ornuna Rebeka Skotty girizdi.
