105-nji gezek geçirilýän Fransiýanyň Kubogy ýaryşynyň finalçylary belli boldy. 1/8 finalda PSŽ-ni ýaryşdan çykaran “Nissa” topary ýarym finalda 4-nji liganyň wekili “Wersal 78” toparyny Guri we Dolbergiň gollary bilen 2-0 ýeňdi. “Nissa” toparynyň finaldaky garşydaşy “Nant” bolup, ol ýarym finalda “Monako” bilen duşuşdy. Çekeleşikli geçen oýnuň esasy wagty 2-2 deňlikde tamamlandy (Sidibe 21 ö.d., Mutossami 74 – Maripan 12, Boadu 78). Penalti urgularynda 4-2 öňe saýlanan “Nant” 9-njy gezek finala çykdy. Finaldaky 2 topar hem kubogy 3 gezek eýeläp, “Nissa” soňky sapar 1997-nji ýylda, “Nant” 2000-nji ýylda finala çykypdy. “Nissa” topary Fransiýanyň Kubogyny 1952-nji, 1954-nji hem-de 1997-nji ýyllarda, “Nant” welin, 1979-njy, 1999-njy we 2000-nji ýyllarda eýeläpdi. Şeýle-de bu final soňky 7 ýyldaky PSŽ-siz ilkinji final bolar. PSŽ soňky 7 ýylda kubogy 6 gezek eýelemegi başardy. Final duşuşygyň 8-nji maýda “Sen-Deni” stadionynda oýnalar.
