UEFA Ýewropa Ligasynda 1/8 finalyň jogap oýunlary geçirilip, çärýek finala çykan toparlaryň ählisi belli boldy.
Kubogyň iň köp eýelän Sewilýa topary 1-nji oýunda West Hamy 1-0 hasabynda ýeňipdi. Jogap duşuşygynyň esasy wagty iňlisleriň peýdasynda 1-0 hasabynda tamamlandy. Goşmaça wagtda londonlylaryň ukrainaly futbolçysy Andreý Ýarmolenko toparyna ýeňiş getiren futbolçy boldy.
Ispaniýanyň Sewilýa şäheriniň beýleki bir topary Betis hem ýaryşdan çykdy. Öz meýdançasynda Aýntrahtdan 2-1 utulan andalusiýalylar 90-njy minutda öňe saýlandylar. Ýöne nemes kluby goşmaça 30 minutyň iň soňky pursatlarynda, has takygy, 120+1-nji minutda Guido Rodrigesiň ýalňyşlyk bilen öz derwezesinden geçiren goly esasynda hasaby deňlemegi başardy. Iki oýnuň netijesi boýunda 3-2 öňe saýlanan frankfurtlylar çärýek finala gadam basdy.
Şeýlelikde, Sewilýa şäheriniň iki kluby Sewilýa hem-de Betise çärýek finala-da çykmak başartmady. Final duşuşygyň Sewilýa şäherindäki Ramon Sançes Pishuanyň adyny göterýän stadionynda oýnaljakdygyny göz öňünde tutsak, kubok başga şäheriň wekilleriniň elinde asmana göteriler. Şäheriň ýaşaýjylary iki toparyň hem finala çykmagyna garaşýardy. Ýogsam iki klubuň futbolçylary ýaryşy dowam etdirmek üçin tagalla baryny etdiler. Iki klub hem goşmaça wagtda ýaryşdan çykdy.
Öz meýdançasynda Galatasaraý bilen golsuz deňme-deň oýnan Barselona türk toparyny myhmançylykda garşydaşynyň 1-0 öňe saýlanandygyna garamazdan, 2-1 hasabynda ýeňdi. Barselonany çärýek finala çykaran gollary Pedri bilen Obameýang derwezä girizdi.
Fransiýada oýnalan fransuz we portugal klublarynyň arasyndaky 2 duşuşyk hem deňlikde tamamlandy. Ýagny Monako bilen Braga, Lion bilen Porto 1-1 deňme-deň oýnady. Myhmançylykda ýeňiş gazanan Braga (2-0) bilen Lion (1-0) ýaryşy dowam ederler.
Glazgoda 3-0 ýeňen Reýnjers myhmançylykda Srwena Zwezdadan 2-1 utulsa-da çärýek finala çykdy.
Italiýada 3-2 ýeňen Atalanta myhmançylykda hem Baýeri 1-0 ýeňip, ýaryşdaky ýeke-täk italýan kluby bolmagyny dowam etdirýär.
Çärýek hem-de ýarym finalyň bijeleri şu gün çekiler (17:00).
1/8 finalyň jogap duşuşyklarynyň netijeleri:
Galatasaraý – Barselona: 1-2 (0-0)
West Ham – Sewilýa: 2-0 g.w. (0-1)
Aýntraht – Betis: 1-1 g.w. (1-2)
Monako – Braga: 1-1 (0-2)
Lion – Porto: 1-1 (1-0)
Srwena Zwezda – Reýnjers: 2-1 (0-3)
Baýer – Atalanta: 0-1 (2-3)
Leipsig – Spartak M (Leipsig gönümel çärýek finala çykdy)
