“The Rock” atly 228,31 karatlyk armyt şekilli göwher daşy Dubaýda köpçülige görkezilýär. Gymmat bahaly daşyň 11-nji maýda auksion arkaly satuwa çykarylmagyna garaşylýar. “Christie’s” auksion öýüniň wekilleriniň bellemeklerine görä, bu daş häzire çenli satylmak üçin auksion öýüne getirilen getirilen ak reňkli iň uly göwher. Göwher satylmazdan ozal dünýäniň dürli şäherlerinde köpçülige görkeziler. Martyň 26-29-y aralygynda Dubaýda köpçülige görkezilýän daş mundan soňra Taýpeý, Nýu-Ýork we Ženewada sergä çykarylar. Auksion öýüniň halkara derejeli zergäri Rahul Kadakýa Ýakyn Gündogar ýurtlarynda gymmatly daşlara we şaý-seplere hemişe sarpa goýulýandygyny belleýär. Onuň sözlerine görä, daşyň belli bahasy ýok. Sebäbi, ol hakykatdan hem taýsyz.
Mundan ozal “Christie’s” auksion öýüniň satan iň uly göwheri 163,41 karat bolup, 2017-nji ýylda 33 million dollara satylypdyr. “The Rock” atly göwher 20 ýyl töweregi wagt ozal Günorta Afrika Respublikasyndan tapylypdyr we sünnälenipdir. Ak reňkli gymmatly daş ozalky göwherlerden has uly bolmagy bilen tapawutlanýar.
“The Rock” satylmazdan ozal 6-11-nji maý aralygynda Ženewada köpçülige görkeziler.
Bagtyýar Orazmämmedow,
Türkmen döwlet maliýe institutynyň talyby
