Sport gözelligiň, sagdynlygyň, bagtyýar ýaşaýşyň, ruhubelentligiň gözbaşydyr. Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda berk bedenli, sagdyn ruhly, bagtyýar nesli terbiýelemekde döwlet derejesinde uly işler durmuşa ornaşdyrylýar. Sportuň ilatymyzyň gündelik durmuşyna ornaşmagy üçin bimöçber aladalar edilip, ýaşaýyş jaýlarynyň ýanynda, orta mekdeplerde we çagalar baglarynda ýörite sport meýdançalary gurlup ulanylmaga berilýär. Çünki ynsan saglygy hakyndaky aladany ilkinji nobatda goýýan hormatly Prezidentimiz sagdyn durmuş ýörelgesini ünsden düşürmeýär.
Halkyň saglygy ýurduň baýlygy bolup durýar. Häzirki wagtda lukmançylykda saglygy goramak, keselleriň öňüni almak, esasan hem, sagdyn durmuş ýörelgelerini berjaý etmek möhüm meseleleriň biridir.
Biziň ýurdumyzda raýatlaryň saglygyny goramak, keselleriň öňüni almak we netijeli bejergileri geçirmek üçin döwlet derejesinde giň şertler döredilýär. Sagdyn durmuş ýörelgesine eýermek, bedenterbiýe we sport bilen meşgullanmak babatda netijeli işler yzygiderli ýola goýulýar.
Adam saglygyny goramak, ösüp gelýän ýaş nesliň saglygyny pugtalandyrmak üçin bedenterbiýe we sport ileri tutulýan ugurlaryň birine öwrüldi.
Saglygyňy gözüň göreji deýin goramak, onuň gadyryny bilmek biziň her birimiziň özümize baglydyr. Bu barada aýdylan gymmatly pikirler il arasynda dilden-dile geçip, biziň şu günlerimize gelip ýetipdir. «Saglyk – baýlyk», «Saglygyň gadyryn bilgil, hassa bolmazdan burun», «Saglyk başyň täjidir, emma ony diňe hassalar görüp bilýär» diýen ýaly sözler, hakykatdanam, bar zadyň sakasynyň saglykdygyny ýene bir gezek äşgär edýär. Muny häzirki wagtda dünýä halklaryna howp salýan ýiti ýokanjyň mysalynda hem görmek bolýar. Saglyk – satyn alyp bolmaýan baýlyk, emma ony goramak welin, biziň gönüden-göni özümize bagly bolup durýar.
Bu babatda ýurdumyzyň saglygy goraýyş ulgamynda durmuşa geçirilýän oňyn özgertmeler, gazanylýan üstünlikler, ýetilýän belent sepgitler diňe bir ýurdumyzda däl, eýsem, bütin dünýäde gyzgyn goldawa eýe bolýar. Ata Watanymyzyň bu ugurda halkara guramalarynyň birnäçe güwänamalaryna mynasyp bolmagy muny aýdyňlygy bilen subut edýär. Ýurdumyzda Birleşen Milletler Guramasy we onuň iri düzümleri bilen saglygy goraýyş ulgamynda hyzmatdaşlygy giňeltmäge we berkitmäge aýratyn ähmiýet berilýär we netijeli maksatnamalaýyn hyzmatdaşlyk alnyp barylýar.
Her bir adam bedenini berkitmek üçin ertirki maşklar, sport, bedenterbiýe, gezelenç, ylgaw ýaly çäreler bilen meşgullanmagy özüne endik edinmeli. Haýal depginde uzak wagtlap ylgamak adamyň saglygyna ýakyndan ýardam berip, onuň ruhunyň belent, durnukly bolmagyna kömek edýär. Saglyk ylgawyna başlamazdan öň, hökman öz maşgala lukmanyňyz bilen maslahatlaşmaly. Ylgamak üçin awtomobil ýollaryndan uzakdaky tokaýlyk, kölegeli, bag-bakjaly ýerleri, seýilgähleri, stadionlary saýlamaly. Säheriň hoştap howasy göwnüňi açýar, dem alşyňy hem ýüregiň urşuny kadalaşdyrýar. Arassa howada ylgamagyň dem alyş ýollarynyň arassalanmagyna, dem alşyň kadalaşmagyna hem-de horlanmaga isleg bildirýän adama täsiri uludyr.
Saglyk – ynsan ömrüniň bezegi, bahasyna ýetip bolmajak gymmatly baýlykdyr. Adam öz saglygyny saklajak we ony gorajak bolsa, tebigat bilen sazlaşykly gatnaşykda bolmaly, diňe ýagşy işlere baş goşup ýaşamaly, zyýanly endiklerden daşda durmaly. «Sag başym – soltan başym», «Saglygym – begligim», «Saglyk – baýlyk» ýaly nakyllarda hem adam üçin saglykdan uly baýlygyň ýokdugy nygtalýar. Maşgala abadançylygy, jemgyýetiň sagdynlygy, döwletiň kuwwatlanmagy, gülläp ösmegi, halkyň, aýratyn hem, ýaş nesliň saglygyna baglydyr.
Garaşsyzlygymyzyň ilkinji ýyllarynda işlenip düzülen «Saglyk» Döwlet maksatnamasy esasynda saglygy goraýyş ulgamynda uly öňegidişlikler gazanyldy.
Soňky ýyllarda diňe bir paýtagtymyzda däl, ýurdumyzyň welaýatlarynda hem häzirki zaman ülňülerine laýyk gelýän, ylmyň soňky gazananlary bilen enjamlaşdyrylan saglygy goraýyş desgalary gurlup ulanmaga berildi. Olarda ilata ýokary derejeli lukmançylyk hyzmatlary ýerine ýetirilýär. Munuň özi «Döwlet adam üçindir!» diýen ynsanperwer ýörelgäniň bu ulgamda-da üstünlikli durmuşa geçirilýändigini görkezýär.
Behişt OJAROWA,
Myrat Garryýew adyndaky Türkmenistanyň Döwlet lukmançylyk uniwersitetiniň fakultet terapiýasy kafedrasynyň assistenti.
