«Goodreads» internet portalynyň agzalarynyň halaýan kitaplarynyň sanawy taýýarlandy. Bu internet portaly agzalaryna kitaplary, annotasiýalary we beýleki çeşmeleri hödürleýär. “Amazon” kompaniýasyna degişli bolan portal her ýylda pikir soraşma arkaly iň gowy kitaplary saýlap, ýeňijilere baýraklary gowşurýar. Golaýda bolsa portal 2022-nji ýylyň iň köp garaşylýan kitaplarynyň sanawyny taýýarlady. Sanawyň başynda amerikaly romançy Hanýa Ýanagiharanyň «Jennete» kitaby bar. Kitapda 1893-nji ýyllarda ABŞ-da bolup geçýän wakalar barada söhbet açylýar. Ýöne siz eseriň ahyryna ýetýänçäňiz «üç asyry geçmeli» bolýarsyňyz. Kitapda üç gahrymanyň ýaşap geçen durmuşa barada gürrüň berlip, olar dürli döwürlerde ýaşandygyna garamazdan, ykbal olary “duşurýar. Kitapdaky wakalar 1893-nji, 1993-nji we 2093-nji ýyllarda bolup geçýär.
Sanawyň ikinji ornunda Isabel Alýendeniň «Violeta» kitaby bar. Çilili žurnalistiň bu kitabynda bäş ogully maşgaladaky ilkinji gyz bolan Wiýoletanyň durmuşy, Ispaniýadaky adatdan daşary wakalar ussatlyk bilen beýan edýär.
Çarmaýn Wilkersonyň «Gara tort» kitaby üçünji orny eýeläpdir. Eserde Baýron bilen Bennä ejesinden galan täsin mirasy hakda gürrüň berilýär.
Iňlis ýazyjysy Lýusi Foliniň «Pariždäki öý» kitabynda bolsa, täze durmuşa gadam basmak üçin Pariždäki dogany Beniň ýanyna barýan Jessiň başdan geçiren wakalary hakda gürrüň berilýär. Ilkinji dört ýazyjynyň hem zenandygy bellärliklidir.
Şotland ýazyjysy Duglas Stýuartyň “Shuggie Bain” atly eseri 2020-nji ýylda “Booker” baýragyna mynasyp bolupdy. Ýazyjynyň ondan soňra ýazan «Ýaş Mungo» kitaby bolsa bu sanawda orun alypdyr. Kitapda protestant we katolik ynanjynyň wekilleri Mungo bilen Jeýmsiň arasyndaky söýgi hekaýaty barada gürrüň berilýär.
Jennifer Eganyň «Kemput öýi» kitabynda durmuşy bir nokatda kesişýän gahrymanlaryň başdan geçiren wakalaryny bir ýere jemlenýär.
Sanawda degişlilikde, Tara M.Stringfellonyň «Memfis», Emili Sent-Jon Mandeliň «Arkaýynlyk deňzi», Emili Genriniň «Kitap söýüjiler», Imani Perriniň «Günorta Amerika» we Rut Wareniň «Gyz» kitaplary orun alýar.
Eziz ÇARYÝEW,
S.A.Nyýazow adyndaky Türkmen oba hojalyk uniwersitetiniň talyby.
