Şu gün, 17-nji iýunda ýurdumyzyň Mary welaýatynda iş saparynda çäklerinde hormatly Prezidentimiz Serdar Berdimuhamedowa welaýatyň Tagtabazar etrabynyň gaýratly gallaçylarynyň döwlete bugdaý tabşyrmak baradaky şertnamalaýyn borçnamalaryny abraý bilen ýerine ýetirendikleri hakyndaky hoş habar ýetirildi.
«Halkyň Arkadagly zamanasy» ýylynda Tagtabazar etrabynyň edermen gallaçylary 7500 gektarda ýetişdirilen bugdaýdan 17300 tonnanyň ýerine, 17335 tonnadan geçirip bereketli hasyl almagyň hötdesinden geldiler. Bu baradaky tabşyryk 100,33 göterim ýerine ýetirildi. Ortaça her gektardan alnan hasyl 23 sentnere barabar boldy.
Bu zähmet üstünliginiň gazanylmagyna etrabyň ähli daýhan birleşikleriniň, hususan-da, «Marçak», «Saryýazy», «Azatlyk», «Ýaşlyk» daýhan birleşikleriniň uly goşant goşandyklaryny bellemek gerek. Etrapda kombaýnlar, ýük daşaýjy awtoulaglar gije-gündiz bökdençsiz işledilýär. «Marçak» daýhan birleşiginiň kärendeçisi Muhammetaman Omarow 2 gektardan 9360, «Ýaşlyk» daýhan birleşiginiň kärendeçisi Töremyrat Işangeldiýew 3 gektardan 16800 , «Azatlyk» daýhan birleşiginiň kärendeçisi Altynjemal Taganowa 1 gektardan 5483, «Saryýazy» daýhan birleşiginiň kärendeçisi Ogulgerek Weliýewa 2 gektardan 10195 kilogram hasyl almagyň hötdesinden geldiler. Hormatly Prezidentimiziň tagallalary netijesinde kärendeçiler bilen hasaplaşyk işleri günübirin geçirilýär. Bu bolsa hasyl ussatlarynyň zähmet öndürijiligini has-da artdyrýar.
Bu barada «Türkmenistan» gazetiniň elektron nusgasynda habar berilýär.
