UEFA 2024-nji ýylda Germaniýada guraljak Ýewropa çempionatynyň kalendaryny, duşuşyklaryň geçiriljek şäherlerini kesgitledi. Şoňa görä, 17-nji Ýewropa çempionaty 2024-nji ýylyň 14-nji iýuny-14-nji iýuly aralygynda geçiriler. Duşuşyklar 10 şäherde oýnalar. Olar Hamburg (“Volksparkstadion”), Leipsig (“Red Bull Arena”), Berlin (“Olympiastadion”), Münhen (“Allianz Arena”), Gelsenkirhen (“Arena AufSchalke”), Frankfurt (“Waldstadion”), Düsseldorf (“Merkur Spiel-Arena”), Köln (“RheinEnergieStadion”), Dortmund (“Westfalenstadion”) hem-de Ştutgart (“Mercedes-Benz Arena”) şäherleridir. Ady agzalan şäherlerden diňe Düsseldorfdan galan 9-synda, 2006-njy ýyldaky Dünýä Kubogynyň duşuşyklary hem geçirilipdi.

Çempionatyň açylyş duşuşygy 14-nji iýunda Münhen şäherindäki “Allianz Arenada”, final duşuşygy bolsa 14-nji iýulda Berlin şäherindäki Olimpiýa stadionda geçiriler.

Çempionatyň saýlama tapgyrynyň bijeleri şu ýylyň 9-njy oktýabrynda Frankfurtda çekiler. 54 ýygyndy 10 toparça paýlanyp, olaryň 6-synda 5, 4-sinde bolsa 6 ýygyndy çykyş eder. Çempionata jemi 24 ýygyndy gatnaşar. Ýewropa çempionaty 1988-nji ýyldan soň 2-nji sapar Germaniýada geçiriler. EURO 2020-niň käbir duşuşyklary-da Germaniýada geçirilipdi.