Fransiýanyň “Nissa” toparynda tälimçi Kristof Galtieniň ornuna ozalam klubda işlän şweýsariýaly Lusien Fawry wezipä belledi. 64 ýaşyndaky hünärmen 2016-2018-nji ýyllar aralygynda-da “Nissa” toparyna tälim beripdi. 2 ýyllyk şertnama baglaşan Fawr soňky sapar “Borussiýa Dortmunda” tälim beripdi (2018-2020). “Nissa” topary Fawryň tälimçiliginde 2016/2017 möwsüminde çempionaty 3-nji orunda tamamlap, Çempionlar Ligasyna gatnaşypdy.
17 ýyldan soň…
Şeýle-de, futbol äleminde ýene bir belli şahsyýet ozalky klubuna dolandy. “Mançester Siti” bilen şertnamasy tamamlanan braziliýaly ýarymgoragçy Fernandinio 17 ýyldan soň futbola başlan kluby “Atletiko Paranaense” bilen şertnama gol çekişdi. 37 ýaşyndaky oýunçy 2002-2005-nji ýyllar aralygynda bu klubda çykyş edipdi. Ol ondan soň “Şahtýora”, 2013-nji ýylda-da “Mançester Sitä” transfer bolupdy.
