Soňky ýyllarda oba hojalyk pudagynyň robotlaşdyrylmagy dowam etdirilýär. Bu bolsa, işji güýjüni azaltmaga, hasyllylygy ýokarlandyrmaga ýardam edýär. “GroW” atly iki “elli” pomidor ýygýan robot hasyl ýygnamak çykdajylaryny azaltmak, hasylyň hilini ýokarlandyrmak maksady bilen döredilipdir.
“MetoMotion” şereketiniň esaslandyryjysy Adi Nir täze robot barada has jikme-jik maglumat berdi. Onuň sözlerine görä, täze robot ýyladyşhana pudagyna möhüm goşant goşmaga mümkinçilik berýär. Şeýle-de pomidor ýygnamak üçin robot döretmek pikiri diňe bir hasyl ýygnamagy däl, eýsem, şahalary gaýtadan işlemegi hem talabalaýyk ýola goýmaga ýardam eder.
“GroW”-yň işjeňliginden peýdalanyp, daýhanlar hasylyň dowamlylygyny durnukly üpjün etmek bilen, hasyl ýygnamak üçin iş wagtyny 80% tygşytlap bilerler. Bu robot hasyl ýygnaýjynyň ýene bir aýratynlygy pomidor ýygnamakdan başga-da, pomidorlary gaplara salmaga we degişli hasyl arabalaryna ýerleşdirmäge ukyplylygydyr.
Maksatmyrat SAPARMYRADOW,
S.A.Nyýazow adyndaky Türkmen oba hojalyk uniwersitetiniň talyby
