UEFA Çempionlar Ligasynda 2-nji saýlama tapgyrynyň jogap oýunlary oýnaldy. Çekeleşikli geçen duşuşyklardan soň 3-nji saýlama tapgyryna çykan klublar belli boldy. Käbir duşuşyklaryň netijeleri garaşylmadyk ýagdaýda tamamlandy. Şolaryň birinde Gresiýanyň “Olimpiakos” topary öz meýdançasynda “Makkabi Haýfadan” 4-0 asgyn geldi. Duşuşykda ysraýyllylaryň gollaryny Çeri (5), Pierrot (61, 65) hem-de Abu Fani (87) geçirdi. Bir hepde ozalky oýun 1-1 deňlikde gutarypdy. Öz meýdançasynda “Malmö” toparyny 1-0 ýeňen Litwanyň “Žalgiris” topary myhmançylykda hem ýeňmegi başardy. Oýewusi hem-de Oliweiranyň gollary bilen 2-0 ýeňen “Žalgiris” 3-nji saýlama tapgyryna çykdy. Myhmançylykda Irlandiýanyň “Linfild” toparyndan 1-0 asgyn gelen “Bodo-Glimt” topary Norwegiýada 8-0 hasabynda ýeňdi. Geçen möwsümde Konferensiýa Ligasynda şowly çykyş eden norweg toparynyň gollaryny Wetlesen (7), Bonifeýs (21 p), Pellegrino (25, 54 p), Saltnes (29), Espeýord (52, 88), hem-de Sampsted (73) derwezä girizdi. Öz meýdançasynda Şweýsariýanyň “Sürih” toparyny 3-2 ýeňen Azerbaýjanyň “Garabag” topary myhmançylykda 2-2 deňme-deň oýnap, ýoluny dowam etdirmegi başardy. “Garabag” topary 3-nji saýlama tapgyrynda Wengriýanyň “Ferenswaroş” topary bilen duşuşar. Stanislaw Çerçesowyň tälimçiligindäki topar myhmançylykda “Slowan Bratislawany” 4-1 hasabynda ýeňdi. Wenger kluby 1-nji oýunda öz meýdançasynda 2-1 utulypdy. Ermenistanyň “Pýunik” topary 1-nji duşuşykda öz meýdançasynda Lýuksemburgyň “F91 Dudelanž” klubundan 1-0 utulypdy. Jogap oýnunda ýer eýeleri 1-0 öňe saýlansa-da, dessine hasaby deňlän ermeniler 2-nji ýarymda 3 gol geçirdi we 4-1 hasabynda ýeňiş gazanmagyň hötdesinden geldi.
Türkiýäniň “Fenerbahçe” topary öz meýdançasynda Kiýewiň “Dinamosy” bilen duşuşdy. Esasy wagty 1-1 gutaran oýunda goşmaça wagtda ýene bir gol geçiren ukrainalylar 3-nji saýlama tapgyryna çykan tarap boldy. 1-nji duşuşyk golsuz tamamlanypdy. “AEK Larnaka” bilen “Midtýullannyň” arasyndaky duşuşykda 1-nji oýnuň hasaby gaýtalandy (1-1). Goşmaça wagtda-da hasap üýtgemedi we penaltileriň netijesinde “Midtýullann” ýaryşy dowam etdirmäge hukuk gazandy.
2-nji saýlama tapgyrynyň jogap duşuşyklarynyň netijeleri:
Slowan Bratislawa – Ferenswaroş: 1-4 (2-1),
Şkupu – Dinamo Zagreb: 0-1 (2-2),
Sürih – Garabag: 2-2 (2-3),
Wiktoriýa Plzen – HJK Helsinki: 5-0 (2-1),
Bodo-Glimt – Linfild: 8-0 (0-1),
Malmö – Žalgiris: 0-2 (0-1),
Şamrok Rowers – Ludogores Razgrad: 2-1 (0-3),
Şerif – Maribor: 1-0 (0-0),
Olimpiakos – Makkabi Haýfa: 0-4 (1-1),
F91 Dudelanž – Pýunik: 1-4 (1-0),
AEK Larnaka – Midtýullann: 1-1, (3-4 p), (1-1),
Fenerbahçe – Dinamo Kiýew: 1-2 g.w., (0-0)
3-nji saýlama tapgyrynyň duşuşyklary (2-3-nji awgust, 10-njy awgust):
Makkabi Haýfa – Apollon Limassol
Ludogores Razgrad – Dinamo Zagreb
Şerif – Wiktoriýa Plzen
Garabag – Ferenswaroş
Bodo-Glimt – Žalgiris
Srwena Zwezda – Pýunik
Monako–PSW Eýndhowen
Dinamo Kiýew – Şturm Gras
Union Sent-Žillua – Reýnjers
Benfika – Midtýullann
