UEFA Çempionlar Ligasynyň toparçalarynyň bije çekiliş dabarasynda UEFA-da ýylyň tapawutlananlary hem mälim edildi. “Real Madridiň” fransiýaly ýyldyzy Karim Benzema ýylyň futbolçysy, toparyň tälimçisi Karlo Ançelotti bolsa ýylyň tälimçisi diýlip saýlandy. Benzema belgiýaly futbolçylar – Kewin De Bruýne hem-de klubdaşy Tibo Kurtuadan köp ses aldy. Ançelotti bolsa Pep Guardiola bilen Ýurgen Kloppdan öňe saýlanmagy başardy.
Şeýle-de UEFA ýylyň zenan futbolçysy baýragyna Ispaniýanyň hem-de “Barselonanyň” ýyldyzy Aleksia Putellas mynasyp boldy. Angliýanyň ýygyndysyny yklymyň çempiony eden Sarina Wiegman ýylyň tälimçisi diýlip saýlandy.
UEFA-nyň Prezidentiniň ýörite baýragy bolsa futbolda bitiren uly hyzmatlary üçin italiýaly meşhur tälimçi Arrigo Sakkä berildi.
