Argentinanyň Çempionlar kubogy ýaryşynyň finalynda çempion «Boko Huniors» bilen wise-çempion «Rasing» duşuşdy. Willa Mersedes şäherinde oýnalan duşuşykda «Rasing» goşmaça wagtda ýeňiş gazandy. «Boko Huniorsdan» Briaskonyň 18-nji minutdaky goluna «Rasing» topary 22-nji minutda Rohasyň goly bilen jogap berdi. 117-nji minutda Alkaras «Rasing» toparyna ýeňiş getiren goly derwezä girizdi.
Oýnuň esasy wagtynyň iň soňky pursatlarynda her topardan 1 futbolçy gyzyl kart aldy. Ýagny her toparyň kolumbiýaly hüjümçileri Sebastian Willa («Boko Huniors) bilen Ýohan Karbonero («Rasing») meýdançadan çykaryldy. 90+6-njy minutda «Boko Huniorsyň» tälimçisi Hugo Ibarra hem gyzyl kart alyp, tribuna ugradyldy.
Dartgynly geçen oýunda gyzyl kartlar howada gaýmalap, emin Fakundo Teýýo goşmaça wagtda ýene-de 8 futbolça gyzyl kart görkezdi. Şolaryň 7-si «Boko Huniors» toparynyň oýunçylaryna bolup, 3-sini «Rasing» toparynyň futbolçylary aldy. 99-njy minutda «Boko Huniorsdan» Warela 2-nji sarydan soň meýdançadan kowuldy. 120+4-nji minutda gyzyl kart alanlaryň sany hasam artdy. «Boko Huniorsyň» peruly goragçylary Luis Adwinkula bilen Karlos Zambrano, ýarymgoragçy Diego Gonzales, şol sanda «Rasingden» Karlos Alkaras dagy gyzyl kart aldylar. 120+5-nji minutda «Rasingden» Jonatan Galwan, 128-nji minutda «Boko Huniorsdan» Frank Fabra (2-nji sarydan soň) hem-de Dario Benedetto meýdançadan kowuldylar.
Netijede, 11 kişiniň (10 futbolçy, 1 tälimçi) gyzyl kart alan duşuşygynyň ahyrynda Fernando Gagonyň tälimçiligindäki «Rasing» topary 2-nji gezek geçirilýän Çempionlar Kubogy ýaryşynda kubogy ilki sapar asmana götermegi başardy.
