UEFA Çempionlar Ligasynda 1/8 finalyň öňe saýlanan ýene bir duşuşygynda geçen ýylyň finalynda çykyş eden iki klub – “Liwerpul” bilen “Real Madrid” duşuşdy. Enfildde oýnalan oýna “Liwerpul” diýseň erjel başlady. Eýýäm 4-nji minutda Salahyň pasyndan soň Darwin Nunýes topugy bilen topy derwezä girizdi. Bu goldan 10 minut soň, Salahyň özi tapawutlandy. Ol derwezeçi Kurtuanyň uly ýalňyşlygyndan soň hasaby 2-0-a çykardy. “Liwerpulyň” Çempionlar Ligasyndaky iň netijeli oýunçysy bolan Salah (42) bu ugurda Stiwen Jerrarddan öňe saýlandy. Ol umumylykda Çempionlar Ligasyndaky 44-nji goluny geçirip, ýaryşyň iň köp gol geçiren afrikaly futbolçysy Didie Drogbanyň rekordyna şärik boldy. 2-0 öňe saýlanan “Liwerpul” soňlugy bilen bu gollary geçirenine puşman boldy. 2-0-dan soň bilini berk guşan Ançelottiniň şägirtleri dessine hasaby deňlemegi başardy. 21-nji minutda owadan urgy geçiren Winisius Junior 36-njy minutda-da Alisson Bekeriň ýalňyşlygyndan ýerlikli peýdalanyp, hasaby deňledi. Braziliýaly oýunçy bassyr 3 möwsümden bäri “Liwerpulyň” derwezesinden gol geçirip gelýär. 2-nji ýaryma-da “Real Madrid” gol bilen başlady. 47-nji minutda Eder Militao kelle urgusy bilen “Realy” öňe çykardy. 55-nji minutda-da Karim Benzema şu möwsümdäki ilkinji goluny geçirip, bassyr 19 kalendar senenamasy boýunça Çempionlar Ligasynda gol geçiren ilkinji futbolçy boldy. Şeýle-de ol möwsüm babatda 18-nji möwsümde-de gol geçirip, Lionel Messiniň rekordyny gaýtalady. Bu goldan 11 minutda soň ýene-de tapawutlanan Karim Benzema oýna soňky nokady goýdy. Şunlukda, 5-2 hasabynda ýeňiş gazanan “Real Madrid” çärýek finalyň bosagasyndan ilkinji uly ädimini ätdi.
“Liwerpul” topary taryhynda ilkinji gezek UEFA-nyň ýaryşlarynda öz meýdançasynda 5 gol geçirtdi. Şeýle-de, umumylykda 57 ýyldan soň Ýewrokuboklarda 5 gol geçirden “Liwerpul”, pleý-off tapgyrynyň ilkinji duşuşygynda ilkinji gezek öz meýdançasynda Angliýadan bolmadyk klubdan asgyn geldi.
