Finlýandiýanyň sagçy Milli koalisiýa partiýasy (NKP) 2-nji aprelde geçirilen parlament saýlawlarynda ýeňiş gazandy, ýöne iň ýakyn bäsdeşleri bolan “Hakyky finler” we Sosial-demokratlar onuň yz ýanyndan gelýär. “Hakyky finler” iň gowy netijeleri görkezip, Sosial-demokratlardan öňe geçmegi başardy. Saýlawlaryň netijelerini ýurduň ýustisiýa ministrligi mälim etdi.
NKP sesleriň 20,8%-ine eýe boldy (48 orun). “Hakyky finler” partiýasy 20,1% (46 orun) bilen ikinji orny eýeledi. Üçünji orunda Premýer-ministr Sanna Mariniň ýolbaşçylygyndaky koalisiýadaky dolandyryjy Sosial-demokratik partiýasy (SDP) (sesleriň 19,9% sesi, 43 orun) bar.
“Finlýand merkezi” partiýasy 11,3% (23 orun), Finlýandiýanyň Çep bileleşigi – 7,1% (11 orun), “Ýaşyllar” bileleşigi – 7% (13 orun), Şwed halk partiýasy – 4,3% (9 orun), Finlýandiýanyň hristian partiýasy – 4,2% (5 orun) we “Häzir” hereketi – 2,4% (1 orun).
Gatnaşanlaryň sany 71,9% boldy. Bu görkeziji dört ýyl ozal, 72,1%-e ýeten öňki saýlawlar bilen deňeşdirilende üýtgemedi diýen ýaly. Finlýandiýanyň Premýer-ministri Sanna Marin saýlawlarda Sosial Demokratik partiýasynyň ýeňilendigini boýun aldy, Petteri Orpo bolsa, baştutanlygyndaky NCP-iň ýeňşini mälim etdi.
Saýlawlar barada
Saýlawlaryň resmi netijeleri 5-nji aprelde tassyklanar. Finler 22 partiýadan 2 müň 424 dalaşgär saýlady, bu öňki saýlawlara garanyňda, 44 syýasatçy az we 3 partiýa köp. Bu syýasy çärede 18 ýaşdan uly raýatlar ses berdiler. Dalaşgärleriň ortaça ýaşy 45,8, saýlawçylaryňky – 51,7 ýaş.
Finlýandiýada öňki parlament saýlawlary 2019-njy ýylyň ýazynda geçirildi. Netijede, bäş partiýanyň wekillerinden hökümet döredildi. Bular ýeňiji Sosial-demokratik partiýa (SDP), “Finlýand merkezi”, şeýle hem kiçi koalisiýa bileleşigi “Ýaşyllar”, Finlýandiýanyň Çep bileleşigi we Şwed halk partiýasy ýaly syýasy partiýalardan ybarat.
