UEFA-nyň 2-nji derejeli klub ýaryşy Ýewropa Ligasynda çärýek finalyň 1-nji duşuşyklary oýnaldy. 1-nji oýunlarda 2 topar 1-0 hasabynda üstün çykan bolsa, 2 duşuşykda ýeňiş gazanan bolmady.
Gollaryň 4-sini hem “mançesterliler” geçirdi, ýöne ýeňiş gazanan bolmady
“Old Traffordda” oýnalan “Mançester Ýunaýted” – “Sewilýa” duşuşygynda ýeňiş gazanan bolmady. Marsel Sabitseriň 14-nji we 21-nji minutlarda geçiren gollary bilen 2-0 öňe saýlanan “Mançester Ýunaýted” soňky minutlarda öz oýunçylarynyň öz derwezesinden geçiren gollaryna alaç tapyp bilmedi. 84-nji minutda Taýrell Malasia, 90+2-nji minutda-da ätiýaçdan oýna giren Harri Maguaýr topy öz derwezelerinden geçirip, hasaby deňlediler. Şunlukda, “Mançester Ýunaýted agza-burna gelen ýeňşi öz goragçylarynyň geçiren gollary bilen elden giderdi.
Şensnyý hemmäni alada goýdy
“Ýuwentus” – “Sporting” duşuşygynda ýeňijini ýeke-täk gol kesgitledi. 73-nji minutda Federiko Gattiniň takyk urgusy turinlilere ýeňiş getirdi. Duşuşykda 1-nji ýarymyň ahyrlarynda “Ýuwentusyň” derwezeçisi Woýçeh Şensnyý döşüni tutup, hemmäni howsala düşürdi. Ol gözýaşlary bilen oýunda çykyp, ornuny Mattia Perine tabşyrdy.
Bu gezek “Feýenoord” ýeňdi
Edil şeýle netije geçen ýylyň Ýewropa Konferensiýa Ligasynyň finalçylarynyň arasyndaky duşuşykda-da hasaba alyndy. Ýagny “Feýenoord” öz meýdançasynda “Romadan” 1-0 üstün çykdy. Rotterdamlylara ýeňiş getiren ýeke-täk pökgini Mats Wiffer (53) derwezä girizdi. Ýeri gelende aýtsak, şol finalda “Roma” 1-0 ýeňipdi.
Lewerkuzendäki oýunda-da “Baýer” bilen “Ýunion Sent-Žillua” Wirtsiň (82) hem-de Bonifaseniň (51) garşylykly gollary bilen 1-1 deňme-deň oýnady.
