Häzirki wagtda Kopengageniň ilatynyň ýarysy diýen ýaly welosiped sürýär we welosiped ýollarynyň hem-de olaryň
duralgalarynyň sany yzygiderli artýar. Kopengageniň ulag ulgamynda hususy awtoulaglardan welosipedlere
geçilmeginiň esasy sebäbi eýýäm 70-nji ýyllarda ýüze çykan howanyň hapalanmagy we ulag dyknyşygy meseleleri
bolup durýar. Daniýanyň paýtagtynyň köçelerinde welosipedleriň şol döwürlerden bäri ulanylýandygyna
garamazdan, beýleki ýol hereketine gatnaşyjylar köplenç olaryň hukuklaryna göz ýumýardylar.
Şol wagtlar Daniýanyň hökümeti welosiped sürýänleri goldamak maksady bilen çäre görmek kararyna gelipdi.
1980-nji ýyllarda şäher häkimligi tarapyndan kabul edilen Kopengageniň welosiped infrastrukturasy köp ýyllaryň
dowamynda ösdürilip, birnäçe tapgyrlary öz içine alýar. Ilki bilen welosiped sürýänleriň howpsuzlygyny
ýokarlandyrmak üçin köçelerde tizlik çägini peseltmek syýasaty alnyp baryldy. Ikinjiden, welosiped sürýänler üçin
has ygtybarly we amatly bolar ýaly täze welosiped ýollary we köprüler guruldy, bar bolanlary döwrebaplaşdyryldy.
Üçünjiden, welosiped duralgasyny gowulandyrmak, şol sanda, öýleriň we döwlet edaralarynyň ýanynda welosiped
duralgalaryny gurmak boýunça işler edildi. Dördünjiden, welosiped satyn almak we abatlamak üçin subsidiýalar,
şeýle hem mugt welosiped kärendesi we welosiped gezelençleri ýaly welosiped sürýänlere dürli goldaw
maksatnamalary girizildi.
Kopengagende welosiped infrastrukturasy üçin esasy üstünlikli faktorlarynyň biri, raýatlaryň strategiýany işläp
düzmäge gatnaşmagydyr. Şäheriň ýaşaýjylary pikirleri we taslamalary jemgyýetçilik forumlarda ara alyp
maslahatlaşmak we öňe sürmek arkaly bu işe öz goşantlaryny goşdylar. Bu, şäher häkimligine welosiped
infrastrukturasyny ösdürmek strategiýasyny işläp düzmekde ýaşaýjylaryň zerurlyklaryny we pikirlerini göz öňünde
tutmaga mümkinçilik berdi.
Netijede, häzirki wagtda 600 müň ilatly Kopengagende 390 kilometrden gowrak welosiped ýoly, 20 müňden
gowrak dürli welosiped duralgalary bar. Welosiped sürýänler ýollarda ileri tutulup, ýolyşyklaryň köpüsinde
welosiped sürýänler üçin goşmaça signallar bar. Mundan başga-da, Kopengagende şäher ilatynyň şäheriň islendik
ýerindäki jemgyýetçilik stansiýalaryndan welosiped kärendesine alyp biljek programmasy bar. Şeýle hem,
Kopengagende “Copenhagen Bike Show” we “Copenhagen Pro” ýaly welosiped sürmek bilen baglanyşykly dürli
çäreleri geçirýär. Dükanlaryň we restoranlaryň köpüsinde welosipedler üçin niýetlenen ýörite duralgalar bar.
Bu çäreleriň netijesinde, Kopengagen howanyň hapalanmagyny azaltmagyň hötdesinden geldi we Ýewropanyň
ekologiýa taýdan arassa paýtagtlarynyň birine, şeýle hem welosiped sürýänler üçin iň howpsuz şäherleriň birine
öwrüldi. Şol bir wagtyň özünde welosipedler Kopengagende şäher medeniýetiniň möhüm bölegine öwrüldi. Öz
gezeginde ýerli ýaşaýjylar gyşyň sowugyna, güýçli ýagyşlara garamazdan, şäherde welosipedli aýlanmagy iň amatly
we iň çalt usul hasaplaýarlar.
