Özbegistanyň häzirki Prezidenti Şawkat Mirziýoýew 9-njy iýulda geçirilen nobatdan daşary Prezident saýlawlarynda 87,5% ses alyp, ýeňiş gazandy diýip, Merkezi saýlaw toparynyň başlygy Zainiddin Nizamhojaýew habar berdi.
-Deslapky maglumatlara görä, Mirziýoýewe 13 625 055 adam ýa-da ses berişlige gatnaşan saýlawçylaryň 87,5%-i ses berdi – diýip, ol belledi.
Prezident saýlawlarynda 19,5 milliondan gowrak saýlawçy hasaba alnyp, şolardan 15 671 405 ses berdi. 28-nji iýundan 5-nji iýul aralygynda 800 müňden gowrak saýlawçy, şol sanda daşary ýurtlarda ýaşaýan 188 müň töweregi saýlawçy wagtyndan öň ses berdi.
Şawkat Mirziýoýew 1989-njy ýyldan bäri ýurda ýolbaşçylyk eden ilkinji döwlet Baştutany Yslam Karimow aradan çykandan soň 2016-njy ýylyň dekabrynda geçirilen nobatdan daşary saýlawlarda Özbegistanyň Prezidenti wezipesine saýlandy. 2021-nji ýylyň oktýabr aýynda Mirziýoýew 80,12% ses alyp, täze saýlawlarda ýeňiş gazandy.
Aprel aýynda Özbegistanda Konstitusiýany üýtgetmek, şol sanda Özbegistanyň Prezidentiniň ygtyýarlyk möhletini bäş ýyldan ýedi ýyla çenli uzaltmak boýunça sala salşyk geçirildi. Teklip edilen üýtgetmeleri saýlawçylaryň 90,2%-i goldady.
Maý aýynyň başynda Mirziýoýew, Konstitusiýa girizilen üýtgetmelere bil baglap, möhletinden öň prezident saýlawlaryny geçirmek barada karara gol çekdi.
